المشهد الأو ل
الأم جالسة على الأرض على حصيرة فى بيت فقير وأثاث بسيط جدًا و تعد ساندويتش ,و تسعل من حين لآخر.
الأم:(تنادى) مارينا ..مارينا...خلصي بقى عشان اتأخرتي على ميعاد المدام ..يللا يا حبيبتي الساعة بقت 8..كل ده بتلبسي؟؟
مارينا :( تظهر على المسرح وهي تتثاءب,وملابسها بسيطة جدًا)
أوف بقى يا ماما مش عايزة اشتغل النهاردة..أنا زهقت بقى.
الأم : معلش يا بنتي .. ما انتي عارفة إللي جرالنا من يوم ما أبوكي سابنا وأنا قربت أخف وإن شاء الله دي تكون آخر مرة تشتغلي فيها بدالي..معلش يا مارينا استحملي لغاية ما ربنا يفرجها علينا.
مارينا: بس بكرة العيد يا ماما , وأنا حتى ما اشتريتش هدوم جديدة زي باقي البنات .
الأم : معلش يا مارينا, الهدوم مش كل حاجة يا بنتي وبعدين بكرة ربنا يفرجها علينا واشتريلك كل اللي انت عايزاه,وانهارده المدام هتديكي 40جنيه بحالهم..ويمكن تديكي لبس من بتاع بنتها و لا حاجة,يللا عشان ما تتأخريش خدي الساندويتش ده في ايدك وانتي نازلة
(تناولها ساندويتش)..باي باي.
المشهد الثاني
مارينا:تكلم نفسها وهي تمشي في الشارع هو أنا دايما كده..بابا في السجن وماما عيانة ..وكمان أصحابي سابوني....ومين هيصاحب واحدة أبوها مسجون؟...
كان نفسي أجيب هدوم العيد زي بقية الناس وبابا نويل يديني هدية..
(بابا نويل يعبر أمامها وهو يحمل شنطة هدايا كبيرة جدًا على ظهره)
مارينا:(تشاهده بشغف شديد) بابا نويل أهو...ياه كل دي هدايا..يا بخت العيال إللي هياخدوا منها ..أكيد مش هيرضى يديني وأنا هدومي
مش نضيفة و شكلي وحش كده.
يخرجان الاثنان من المسرح))
الراوي:وفعلا وصلت مارينا عند الست إللي هتنضفلها الشقة.
وقعدت تشتغل وتنضف طـــــــــــــــــــــول اليوم..و في آخر اليوم خدت أجرتها ومشيت.
مارينا:( تظهر على المسرح.) أنا تعبت أوي انهارده (بابا نويل يدخل المسرح من الجهة المقابلة لها) ....
إيه ده بابا نويل لسه بيوزع الهدايا!!أما أجري بسرعة و أطلب منه هدية يمكن يديني.
(تنادي) بابا نويل بابا نويل...
بابا نويل: أيوه ..نعم
مارينا:ممكن تديني هدية؟؟
بابا نويل:(يُظهر لها شنطة الهدايا الفارغة) للأسف كل الهدايا إللي معاياخلصت
مارينا:يعني ما فضلش ولا هدية؟؟
بابا نويل:لأ..ما فضلش ولا هدية.
مارينا:(تنصرف فى حزن) أنا عارفة ان حظي وحش.. كان نفسي آخد هدية في العيد.
بابا نويل:تعالي يا......انتي اسمك إيه؟؟
مارينا:انت بتناديني؟؟
بابا نويل:أيوة,بأقولك اسمك إيه؟
مارينا:اسمي مارينا.
انتي نفسك في هدية يا مارينا. :بابا نويل
مارينا:آه
بابا نويل: ليكي عليا هتاخدي أكبر و أحلى هدية في كل الهدايا
(تتسع عيونها من الاندهاش)
بابا نويل: امسكي فى العكاز بتاعي و لفي معايا...مستعدة؟ 1..2..3..يللا نلف
(يمسك هو فى طرف العكاز و هى فى الطرف الآخر و يلفان بينما يُسدل ستار المسرح)
المشهد الثالث
يُفتح الستار و بابا نويل و مارينا واقعين على الأرض و المشهد وراءهما هو مكان ميلاد الرب يسوع:العذراء مريم ويوسف النجار و الطفل يسوع في المذود و حولهم الحيوانات)
مارينا:( تقوم وتقف )أنا فين.. إيه المكان ده..إف إيه الريحة الوحشة دي !!!
بابا نويل: مارينا ..بصي كويس..انتي عارفة الناس دول..
مارينا: مين الناس دول؟؟ دول شكلهم فقراء أوي....يا عيني بص يا بابا نويل !!ده النونو محطوط في المذود اللي الحيوانات بتاكل منه!!..
بابانويل: يا مارينا النونو ده مش فقير و لا حاجة ..النونو ده يبقى أغنى واحد في كل الدنيا.
مارينا:(تنظر إلى بابا نويل بتعجب) أغنى واحد في كل الدنيا إزاي؟؟ أمال إيه اللي مقعده مع الحيوانات كده!!
بابانويل: هو جه هنا عشانك.. علشان بيحبك يا مارينا.
مارينا:عشاني!!؟؟ بس أنا ما أعرفوش.
بابانويل:مش قلتلك إنك هتاخدي أكبر هدية مني انهارده.
مارينا: أنا مش فاهمة حاجة خالص.
بابا نويل: أنا هأفهمك كل حاجة دلوقتي, ركزي معايا وفتحي ودانك.. الله لما خلق آدم وحواء زمــــــــــــــــــــان كان بيحبهم أوي وكان عايزهم يفضلوا عايشين في علاقة معاه علطول..لكن يا خسارة الحية اللي هي الشيطان ضحكت عليهم ووقعتهم في الخطية وأجرة الخطية موت زي ما أنتي عارفة ..لكن الله عشان بيحب كل الناس مرضاش أبدًا إنه يسيبنا نموت ونروح جهنم.....بس لازم حد ياخد عقاب كل الخطايا اللي احنا عملناها و يموت بدالنا , فقرر ربنا إنه ينزل و ياخد صورة انسان و يعيش على الأرض و يموت بدالنا و بموته يدينا الحياة و لما نآمن بيه يدينا حياة أبدية و نبقى ولاده .
مارينا:أنا عارفة الحكاية دي يا بابا نويل..بس إيه علاقتها بالنونو ده؟؟
بابا نويل: كل ده ولسه ما فهمتيش يا مارينا؟؟النونو ده هو يسوع ,الله الظاهر في الجسد.
مارينا:وأنا بأقول إني شفت المكان ده قبل كده....(بذهول شديد) مش معقول أنا مش مصدقة..يعني أنا واقفة دلوقتي فى الحظيرة اللي اتولد فيها الرب يسوع!!!
(تسكت لحظات وتفكر)
بس انت متأكد إن الرب يسوع اتولد مخصـــــوص عشاني؟؟
بابا نويل: أيوة متأكد مية في المية
مارينا:أصل أنا مليش أصحاب و مفيش حد بيحبني..مش معقول ربنا يكون بيحبني.
بابا نويل: ده الرب يسوع هو أكتر واحد بيحبك في كل الدنيا ..اسمعي يا مارينا ,انتي عارفة لو ماكنش في الدنيا غيرك ,كان الرب يسوع جه برضه عشانك..صدقيني ده بيحبك جدًا أكتر مما انت تتخيلي.
مارينا:انت عارف لو كلامك ده صح؟ ده يبقى أجمل خبر سمعته فيحياتي.
بابا نويل: طب إيه رأيك لو جبيلك آية من الكتاب المقدس بتقول كده؟
مارينا: لو جبيلي آية من الكتاب المقدس هأصدق علطول.. أنا بأصدق الكتاب المقدس لأن ربنا هو اللي كاتبه و ربنا عمره ما يكدب.
بابا نويل: (يُخرج الانجيل من الشنطة) فى رسالة غلاطية الإصحاح الثاني وآية 20 "ابن الله الذي أحبني وأسلم نفسه لأجلي" تعالي نحط اسمك في الآية و نقراها تاني..
مارينا و بابا نويل: ابن الله الذي أحب مارينا وأسلم نفسه لأجل مارينا.
مارينا: يا سلام ده أحسن خبر سمعته في حياتي.. بابا نويل أنا عايزة أقدم للرب يسوع هدية وأسجدله وأشكره..
بابا نويل: و أنا كمان عايز أسجدله..بس انتي مش معاكي هدية؟؟
مارينا : ما تقلقش أنا معايا هدية.
(يقتربوا مكن المذود)
بابا نويل: ( يكلم العذراء ويوسف النجار) احنا جايين عشان نسجد للرب
يسوع.
العدراء: اتفضلوا.
مارينا: ( تركع أمام المذود هي وبابا نويل) يا رب يسوع أشكرك لأنك اتولدت عشاني ,أنا بأسجدلك من كل قلبي . أنا صحيح مش معايا هدية
أقدمهالك بس هديتي هي قلبي ..أنا بأقدمهولك عشان تسكن فيه
علطول..من فضلك نضفه من الخطية اديني قلب جديد..
ترنيمة ربي يسوع علشاني (يدخل بعض الأطفال للمشاركة في الترنيمة)
بابا نويل: يللا يا مارينا,لازم نرجع دلوقتي.
مارينا : سبني شوية يا بابا نويل ..عايزة اتكلم معاه شوية.
بابا نويل: لازم نمشي دلوقتي , ولو انتي عايزة تكلمي الرب يسوع تبقى
تكلميه في الصلاة وتحكيله على كل اللي في قلبك.. كأنك
شايفاه بالظبط وهو هيسمعك ويستجيب.
مارينا: سلام يا رب يسوع ..أشكرك لأنك اتولدت عشاني .. أنا مش هأبعد عنك أبدا, وهأكلمك في الصلاة كل يوم وهأخليك تبقى صاحبي.
(بابا نويل يمسك بالعكاز ومارينا بالطرف الآخر و يلفوا و تغلق الستارة).
المشهد الرابع
تُفتح الستارة وهما واقعين على الأرض
بابا نويل: يللا قومي يا مارينا.
مارينا: ياه ده أجمل عيد ميلاد قضيته في حياتي, شكرا يا بابا نويل على
الهدية دي..انت عارف أنا خلاص ما بقتش زعلانة إن ما عنديش
أصحاب وإن ظروفي وحشة , كفاية إن الرب يسوع بيحبني و أنا
هأطلب منه يديني أصحاب يحبوني...........ياه أنا أتاخرت أوي على
ماما لازم أروح دلوقتي . باي باي يا بابا نويل.
بابا نويل: باي باي يا مارينا.
المشهد الخامس
صوت طرق على الباب و الأم تظهر في المشهد و هي ذاهبة لتفتح الباب.
الأم : انتي جيتي يا حبيبتي.. عندي ليكي مفاجأة,
مارينا: أنا اللي عايزة أحكيلك على اللي حصلي انهارده.
الأم: شوفي المفاجأة دي الأول, مش انتي كان نفسك في هدوم العيد؟
مارينا: يا ماما , الهدوم مش كل حاجة و بعدين أنا خلاص مش زعلانة.
الأم: بصي(تمسك في يدها لبس جديد).
مارينا: دي ليا؟!!!!
الأم: آه.. طنط من الكنيسة جت وجابتهم
مارينا: بجد يا ماما!!انتي عارفة مين اللي بعت طنط دي؟ الرب يسوع هو
اللي بعتها عشان هو بيحبني ومهتم بيا...أشكرك يا رب يسوع على الهدوم, أنا بحبك أوي.
اسمعي بقى يا ماما إللي حصل معايا انهارده, ده انتي مش
هتصدقي ودانك.. تعالي لما أحكيلك الحكاية يالتفصيل.
أ/ إيمان بطرس
© www.madareselahad.org