اكتر حاجة بتجذب انتباه الاطفال الوقت ده هي الألعاب الالكترونية .. وعلشان تكون مدرسة الاحد جذابة وشيقة للطفل لازم تكون في افكار جديدة زي الالعاب الالكترونية بتشد انتباههم وتشجعهم على حفظ كلمة الله.

والنهاردة بنقدم فكرة جديدة تقدر تستخدمها كمسابقة لتحفيز الاطفال سواء كانت المسابقة اسبوعية او في حفلة او مسابقة اثناء فرصة الترانيم او حتى جوة الفصل هتكون ممتعة جدا ليهم.

وهي عبارة Template جاهزة للعجلة الدوارة اللي بنلعبها على الموبايلات بتاعتنا تقدر تغير وتعدل فيها براحتك حسب المسابقة اللي هتقدمها للطفل.

ازاي تستخدمها؟

⬩ بتحمل عندك الباوربوينت اللي موجود هنا.

⬩ بتفتحه وتبدأ تعدل الحاجات اللي فيه من 1 – 12 حسب المسابقة اللي بتقدمها للطفل.

⬩ وبتدوس F5 علشان تعرضها واول ما هتدوس علامة التشغيل ► هتلف لحد لحد ما تدوس على علامة التوقف II.

تستخدمها في ايه!

1- لو هتعمل مسابقة ما بين فريقين وفريق كسب، يطلع واحد من الفريق يلفها وهو وحظه هيضيف لفريقه كام درجة!

2- لو هتعمل فقرة بين الترانيم والدرس تكون مسابقات فردية كـ(تحدي) للاطفال ((اختارى 12 طفل وكل واحد هيلف العجلة وحسب ما تقف عند الرقم هيعمل الطلب اللي مطلوب سواء انه يقول اية او يرنم ترنيمة لوحده في المايك او يلعب لعبة صعبة او يجاوب سؤال او يرسم رسمة والاطفال يعرفوها او يحسب مسألة رياضية أو حظ سعيد يدخل من غير هدية أو يقول معلومة عامة هو عارفها او مثل شعبي او يعمل حركات لترنيمة او يدوق اكله حتى لو مبيحبهاش او يحكي قصة شخصية كتابية انت هتقوله عليها)).

3- لو هتاخد فكرة في الترانيم عن الطاعة مثلا، طلع كل الشخصيات اللي في الكتاب اللي كانت مطيعة للرب او مكانتش مطيعة واكتب اسمائها والطفل يطلع يلف العجلة والشخصية اللي تطلعله يقول الموقف اللي كان فيه طاعة في حياة الشخصية دي، او الموقف اللي مكنش فيه طاعة.

4- ممكن تكون مجهز 12 سؤال معاك والطفل بيختار من 1 – 12 وحسب الرقم بتاعه بيجاوب على السؤال.

كل دي مجرد افكار ممكن تساعدك لتقديم كلمة الله بشكل جديد وشيق ... تقدر تبدع وتفكر في افكار تانية وتوظف العجلة دي على حسب الفكرة او المسابقة بتاعتك ... ربنا يبارككم ♥