الشخصيات: الأم، آدم، جون، هاني
الأم: يالا يا آدم صباح الخير ياحبيبي اصحى النهاردة أول يوم في المدرسة فين النشاط؟!..فين الحيوية؟!
آدم: ياااااه ياماما الأجازة خلصت بسرعة كان نفسي تطول علشان أنام براحتي
وأصحى براحتي وأتفسح كتيييير.
الأم: معلش ياحبيبي دي أجازة نص السنة والترم التاني بيخلص بسرعة والأجازة أكيد هاتيجي وتعمل فيها كل إللي نفسك فيه.
آدم: حاضر ياماما أنا هاقوم حالا أهو
يردد بصوت هادي (أنا أكتر حاجة مخلياني متحمس إني هارجع أشوف أصحابي)
(ينزل آدم خلف الستارة)
الأم: وأنا هاحضرلك الفطار لغاية لما تجهز
(تنزل ماما من الستارة وترجع معاها الفطار)
الأم: يالا يا آدم أنا جهزتلك الفطار ياحبيبي وكمان السندوتشات إللي بتحبها
آدم: شكراً ياماما أنا دايماً باتعبك معايا
ماما: مافيش تعب ياحبيبي ده دوري ولازم أعمله.
آدم: أنا كده تمام وجاهز سلام ياماما
ماما: ربنا معاك ياحبيبي ويحافظ عليك
الراوي في المايك (يروح آدم المدرسة ويحضر الحصص بتاعته وييجي وقت الفسحة)
يظهر جون مع آدم في المسرح
جون: ياآدم إزيك ياصاحبي عامل إيه واحشني جدااااا
آدم: ياااااه ياجون رغم إنها كانت أجازة قصيرة لكن واحشتني جداً وواحشني كلامنا مع بعض.
جون: يالا ياعم أهي الأجازة خلصت ورجعنا تاني نقضي وقت جميل مع بعض
آدم: أنا باشكرربنا إن عندي صاحب زيك
جون: أنا إللي حقيقي باشكر ربنا عليك يا آدم
إنت أخ وصديق وصاحب وأنا بافتخر إنك صاحبي ... انت عارف اد ايه مهم إني أخد بالي وأنا باختار أصحابي
هاني يطلع من ورا الستارة
هاني: احم احم أنا هنا ....إيه كمية الكلام الجميل ده عن صداقتكم
أولاً إزيكم يااصحابي وحشتوني جدا وكمان أصحابي في مدارس الأحد وحشوني جدااااا إزيكم كلكم يا أصحابي عاملين إيه مستعدين للمدرسة؟...... برافو عليكم كلكم
ثانياً: ليه مهم بقى يا آدم أختارأصحابي طيب ما أنا ممكن أصاحب أي حد وخلاص هي كلها كام ساعة بنقضيها في المدرسة ونرغي شوية ونروح ونصحى تاني يوم نكرر نفس إللي بنعمله كل يوم
آدم يقاطع هاني: لأ لأ ياهاني أنا مش معاك خااالص في الكلام ده
هاني: ليه بقى؟!
آدم: لما بنختار أصحابنا لازم يكونوا أولاد ربنا ماأكونش باصاحب أي حد وخلاص... الكتاب المقدس بيعلمنا كده إننا لازم نختار أصحابنا إللي بيشبهونا ويكونوا أولاد للرب يسوع علشان نقدر نوصل النور لكل إللي حوالينا
هاني: نور... نور إيه؟!
آدم: النور هو يسوع وكلامه إللي موجود في الكتاب المقدس
هاني: آه أنا كده فهمتك .... طيب إزاي أقدر أعرف الأصحاب الكويسيين أولاد الرب يسوع من باقي الناس إللي حواليَّ؟
آدم: تعرف إننا في مدارس الأحد أخدنا درس شبه إللي بنتكلم فيه دلوقتي كان أنكل بيتكلم عن آية بتقول "من ثمارهم تعرفونهم" وكان بيقوللنا إن الثمر الحلو بيبان والثمر الوحش كمان بيبان
هاني: طيب وليه مهم أختارأصحابي يكونوا أولاد للرب يسوع؟!
آدم: تخيل ياهاني لو كنت مصاحب واحد مش من أولاد يسوع وطلب منك في إمتحان مثلاً إنك تغش أو في موقف معين إنك تكذب أو تشتم وغيرها حاجات وحشة كتير أكيد تصرفاته هاتأثر عليك زي ما الكتاب المقدس بيقول (إن المعاشرات الردية تفسد الأخلاق الجيدة) تفتكروا يااصحابي ده هايكون حاجة حلوة ولا وحشة؟
جون: فعلاً يا آدم إنت عندك حق فيه موقف شبه كده حصل معايا كان فيه ولد صاحبي السنة إللي فاتت وكان بيغش وكان عاوزني أعمل زيه لكن أنا رفضت وقولتله إن كده غلط وإن دي إسمها خطية لكن هو للأسف ماسمعش كلامي وفضل يتريق عليَّ لكن أنا ماكنتش عاوز الرب يسوع يزعل مني.
آدم: برافو عليك ياآدم إنت فعلاً اتصرفت صح.
هاني: شكراً ليك ياآدم لأنك قولتلي على الكلام المهم ده وشاركته معانا
أد إيه مهم جدا جدا إننا نختار أصحابنا علشان لو اختارناهم صح أكيد هانشجع بعض إننا نقرب من الرب يسوع لكن لو اختارناهم غلط للأسف هايبعدونا عن الرب يسوع وبكده النور اللي فينا هاينطفي.
آدم: فعلاً ياهاني إنت عندك حق في كل كلمة بتقولها
جون: طيب ياترى هاقدر أعرف بسهولة أولاد الرب يسوع؟
مين ممكن من أصحابنا يقولنا إزاي ممكن أعرف الناس أولاد الرب يسوع؟
آدم:- أكيد الموضوع ممكن ياخد وقت ومجهود لكن لما نطلب من الرب يسوع أكيد هايساعدنا والشخص إللي بيحب الرب يسوع بيكون مليان من ثمر الروح
هاني:- وإيه هو ثمر الروح يا آدم؟
آدم: محبة، فرح، سلام، طول أناة، لطف، صلاح، إيمان، وداعة، تعفف ... كل دي ثمار الروح القدس بتظهر جوه أولاده وتميزهم عن باقي الناس في كل مكان يكونوا موجودين فيه.
هاني: شكراً يا آدم على كل الحاجات الجميلة إللي عرفتهالنا النهاردة إنت حقيقي صاحب وصديق رائع. ممكن كلنا يأصحابي نقول لآدم شكراً على كل الحاجات الجميلة إللي شاركنا بيها النهاردة
آدم: شكراً ياهاني على الكلام الجميل ده يالا بينا نطلع الفصل بسرعة بقى علشان الجرس رن
هاني وجون: يالا بينا
آدم: باي باي ليكم انتم كمان ياأصحابي الرب يسوع معاكم وتكونوا بتقضوا وقت جميل في المدرسة
وافتكروا دايماً انكم تختاروا أصحابكم إللي بيشبهوكم وبيكونوا بيحبوا الرب يسوع زيكم كده.
إيفون رزق
جمعية خلاص النفوس بحلوان
©www.madareselahad.org