الشخصيات: كركر- سمسم- سارة
(تفتح الستار )
يدخل كركر المسرح.
كركر: تراللالالالا..تراللالالالا. .ياسلاااام انا مبسوط جدا جدا! أول مرة أكون فرحان بنفسي اوي كده! ماكدبتش ولا مرة! وما شتمتش
اختي لما نرفزتني زي ما كل مرة ما بأعمل لما بتنرفزني بحركاتها المستفزة!! (يفكر) عملت ايه تاني عملت ايه تاني؟؟؟ ايوااااا صحيت الصبح وصليت ورنمت كمان! بجد بجد مفيش أحلي من كده!
يدخل صديقه سمسم
سمسم: أهلاااااا يا كركر! واحشني جدا جدا.. عامل ايه يا ابني؟ ؟
كركر: سمسم ازيك؟؟ انت كمان واحشني اوي! أنا كويس أشكر ربنا و مبسوط جدا كمان!
سمسم : ما أنا واخد بالي من الأبتسامة اللي علي وشك! ايه الجديد؟
كركر(بفخر ): أصلي انا النهاردة-عقبالك كده- ما عملتش ولا حاجة وحشة خاااااااااالص!!
سمسم (بتعجب ): يااااه؟؟
كركر: أيوة! زي ما سمعت! ولا كدبت ولا شتمت ولا اتخانقت. وأكيد طبعا ربنا مبسوط مني اوي! واقولك علي حاجة كمان..أنا لو فضلت ما أعملش حاجة وحشة وطبعا أحاول أعمل حاجات كويسة. .أنا حأروح السما علطووووول!
سمسم (بأبتسامة ): انت متأكد من الكلام ده؟
كركر (بثقة ): طبعا مش عايزة كلام! بص يا سمسم انا عارف انه ربنا مش بيحب الخطية، فلما انا أبطلها هو حيكون مبسوط مني اوي وحياخدني معاه السما، لأني ولد جميل وأعمل حاجات حلوة (بفخر ) أنا متأكد!
سمسم: أيوة طبعا ربنا مش بيحب الخطية لأنه هو قدوس يعني مفيش أي حاجة وحشة هو بيعملها ومبيحبش الخطية طبعا.
كركر: (بفخر): أيوة يا ابني انا كنت متأكد من الكلام اللي بأقوله.
سمسم : السؤال المهم بقي: هل أنت متأكد انك حتى تبطل تعمل خطية أو أي حاجة وحشة يعني؟
كركر : طبعا. .بأقولك النهاردة ولا شتمت ولا كذبت وصليت الصبح.
سمسم: برافو عليك! طيب كنت عايزة أقولك ..النهاردة حنتجمع علشان نلعب كورة قدام بيتكم، وطبعا حنلعب بالكورة بتاعتك.
كركر:حمااااااس! أنا موافق طبعا. .مين تاني حيلعب؟
سمسم: مارك ويوسف وجون و...
كركر(يقاطعه بغضب ): جون لأ!
سمسم (بتعجب) : جون لا ليه؟
كركر(مازال غاضب ): انت بهزر...مش كده؟ انت مش فاكر الخناقة الكبيرة اللي حصلت بيني وبينه بعد ما بوظلي الكورة بتاعتي؟
سمسم(بأستغراب ): دي المشكلة اللي حصلت بعد رأس السنة علطول؟
كركر: أيوة ! ومن يومها انا مش بأتكلم معاه خااااالص! ده انا حتي مش بأسلم عليه.
سمسم: يعني انت مش مسامحه؟؟
كركر: أيوة طبعا...دي كانت الكورة الجديدة!
سمسم: طيب يا سي كركر انت عارف انه عدم المسامحة وعدم الغفران دول خطية؟؟؟؟؟
كركر:(بتردد ): لككككككن انا مش ممكن اسامحه بعد اللي حصل، ده حتي ما اعتذرش!
سمسم: أنا اللي عايز اقولهولك انه احنا مهما حاولنا نعمل حاجات حلوة أو عرفنا نبطل نعمل حاجات وحشة، برضة مش حنقدر منعملش حاجات وحشة خالص! شوف انت بالك شهور مش مسامح جون ودي خطية، حتي لو حاولت تعمل حاجات حلوة .
(تدخل سارة في هذه اللحظة )
سارة: ازيكم يا حلوين؟؟ واضح انه الموضوع اللي انتو بتتكلموا فيه ده موضوع خطيييير، شكلكم جد أوي!
كركر: تعالي يا سارة واسمعي سمسم اللي بيقول كلام غريب جدا! قال ايه ؟؟احنا مش ممكن نبطل نعمل خطية ! طيب أن شاء الله مين حيقدر يروح السما؟؟
سارة: الكلام ده حقيقي يا كركر، احنا كلنا (كل البشر يعني ) مولودية بالخطية وفينا طبيعة وحشة بتحب تعمل الخطية. ودي النتيجة الطبيعية لأن الخطية دخلت العالم من أول ما آدم وحواء أختاروا انهم ميسمعوش كلام الله في جنة عدن.
سمسم: كلامك صح يا سارة. الكتاب المقدس بيقول انه"الجميع زاغوا وفسدوا وأعوزهم مجد الله، ليس من يعمل صلاحا ليس ولا واحد." (يوجه كلامه لكركر )
واخد بالك يا كركر..ولا واحد
كركر: بس ربنا مش بيحب الخطية! أتصرف أزاي في الحاجات الوحشة اللي انا عملتها وبأعملها؟؟
سمسم: الحل في اللي عمله الرب يسوع علي الصليب.
كركر: أزاي بقي؟
سارة: الله عارف انه نتيجة خطية الأنسان موت، وأن الأنسان حيعيش في عذاب ابدي بسبب الخطية ، لكن الله بيحب الأنسان جدا بس مبيحبش الخطية. الله أخد صورة إنسان في الرب يسوع المسيح واخد عقاب خطية كل العالم ومات علي الصليب علشان يدفع تمن الخطية بتاعتنا وقام في اليوم التالت.
سمسم: بالظبط كده! وكل واحد فينا بيقبل عمل الرب يسوع علي الصليب علشانه ويقوله سامحني يارب علي الخطية اللي انا عملتها، انا عايزك تيجي في قلبي وتغيرني، الرب يسوع بيقبله علطول وبيغفرله خطيته وكمان بيديله طبيعة جديدة بتكره الخطية وتحب تعمل الحاجات اللي بتفرح قلب الله.
كركر (بفرح ): الكلام ده حلو اويييييي، وكده انا مش حأعمل حاجة وحشة تاني بعد ما أطلب من الرب يسوع انه يسكن في قلبي ويغيرني!
سمسم: خد بالك يا كركر. .الطبيعة الوحشة لسه موجودة فينا، ولو مسمعتش كلام الرب يسوع حتلاقي نفسك بتقع في الخطية علطول! الطبيعة الجديدة اللي بيديهالنا الرب يسوع بتعلمنا نتصرف صح والنتيجة أننا لو وقعنا في الخطية بنتوب علطوووول وبنعمل الحاجات اللي بتفرح ربنا بينا.
سارة: لما نحفظ كلمة الله اللي بنلاقيها في الكتاب المقدس ونصلي بيها دايما ده حيساعدنا أننا نتغير ومنديش فرصة للطبيعة الوحشة اللي فينا أنها تسيطر علي تصرفاتنا .
كركر(بفرح ): أنا دلوقتي بس عرفت انا حأعمل ايه! أنا حأطلب من الرب يسوع انه يسكن في قلبي ويغيرني وكمان حأطلب منه يسامحني علي كل الحاجات الوحشة اللي انا عملتها يساعدنى أعمل كل الحاجات اللي ترضيه.
سارة(بحماس): ده أعظم قرار انت حتاخده في حياتك يا كركر. انا السنة اللي فاتت أخدت القرار ده وطلبت من الرب يسوع انه يسكن في قلبي ويغيرني وفعلا من يومها حياتي بتتغير والرب يسوع بقي أقرب صديق ليا وانا متأكدة انه حياخدني معاه السما.
تغلق الستار
سالي أنيس
©www.madareselahad.org