عدد الشخصيات: 13
الهدف الروحي: ان يعيش الشاب حياة القداسة حتى وسط العالم ويقول للغلط لا.. والا يكون الشباب داخل المجتمع الكنسي منغلقين لا يرحبون بالشخصيات الجديدة او الغير معروفة في الكنيسة
المشهد الأول:
تدخل داليا وهي تتحدث في الهاتف
داليا: أيوة يا بت يا نرمين زي ما بقولك كده .. تخيلي القمر ده بعد ما قال للممثلة الوحشة ديه إنه عايز يتجوزها .. قالتله انا مبقتش بحس بالأمان معاك .. تخيلي آسر ياسين يتقاله لا .. مش مصدقة بجدددد.. آه يا بنتي ده أنا باعشقه .. ده رهيب رهيب رهيب
يدخل الأب
الأب: داليا
داليا: طاب يا أخت نرمين .. الرب يباركك .. باي
الأب: بتكلمي مين؟
داليا: ديه الأخت نرمين يا بابا.. كنت بشاركها بالحلقة الأخيرة .. إيه بالخلوة ، الخلوة الأخيرة
الأب: ومين إللي بتعشقيه ده ورهيب رهيب ؟
داليا: إيه ! آه ده آسر ياسين .. إيه ، الأخ آسر ياسين . رهيب .. ممسوح أوي
الأب: فعلا.. وده إيه الوعظة إللي قالها وفرقت معاكي أوي كده؟
داليا: العلاقات .. وعظة عن العلاقات يا بابا.. وعظة جميلة
الأب: بس مش غريبة إنه اسمه آسر ياسين .. إنتي متأكدة إن الاسم ده مسيحي؟
داليا: هوب هوب هوب .. لا أصل زمان يا بابا مصر مكنش فيها التعصب إللي موجود دلوقتي .. ومكنش فيه فرق بين مسلم ومسيحي.. فكانوا بيسموا ياسين عادي
الأب: يااااه فكرتيني بأيام زمان .. كانت كل حاجة رخيصة .. والناس كانت طيبة وكل واحد بيلبس براحته .. لا ولابلد كانت فاضية
داليا: بابا .. يلا .. انسى جو الحنين للماضي ده وقولي كنت عايزني في إيه؟
الاب: عندي ليكي خبر رائع .. حزري فزري
داليا : ماتقلش الأخ آسر ياسين جايلنا الاجتماع
الأب: لا أحلى
داليا: إيه ده .. إيه الخبر شوقتني
الأب: أنا حجزتلك في مؤتمر لكنيسة جديدة .. المؤتمر ده معمول لناس معينة وصعب جدا كنتي تلاقي مكان .. فيه الناس إللي بتحب كلمة ربنا أوي .. هيدرسوا سفر حزقيال وأشعياء وأرميا كلهم في أربع ايام .. سبع محاضرات في اليوم
داليا : إيه!!!
الأب: إيه يا حبيبتي شكلك مش مبسوطة
داليا: يا بابا.. إنت عارف إني مش باحب المؤتمرات ديه .. وبعدين أنا زهقت من كتر الاجتماعات والمؤتمرات إللي باروحها .. يا بابا انت لو عصرتني دلوقتي هتلاقيني بانزل وعظات
الأب: وماله .. مش أحسن ما تضيعي وقتك في المسلسلات البرازيلي والكلام الفارغ ده
داليا: تركي يا بابا تركي .. وبعدين ماتغيرش الموضوع .. أنا مش عايز أروح المؤتمر
الأب: آخر كلام هتروحيه ورجلك فوق رقبتك .. وإلا مفيش مصروف ولا خروج
داليا: أوف بجد
يخرج الأب
داليا: إيه الفصلان ده.. أما أفتح النت شوية وأعمل حاجة مفيدة .. كيف توقعي آسر ياسين في حبك في سبع خطوات فقط .. دليل الفتاه العصرية .. حلو ده .. أما أحمله
تخرج داليا
المشهد الثاني :
تدخل روز وأمير
روز: تصدق إنك بجد عيل بخيل وجلده . أنا غلطانة اني مصاحبة واحد زيك
أمير: ليه بس أنا عملت إيه؟
روز: ما هي ديه المشكلة .. إنك ماعملتش حاجة ولا هتعمل .. شايف ريهام صاحبها جابلها إيه في عيد ميلادها ..شكلك مش فارق معاك
أمير: هو اه مش فارق معايا
روز: طيب يبقى هاقولك بما إنك مصمم تعرف .. جابلها تليفون إيفون ب10 آلاف جنيه وعزمها في مطعم غالي أوي .. وبعد كده عملها حفلة كبيرة عزم فيها كل صحابها
أمير: وإيه يعني .. أنا مش جبتلك كيس شيبسي بالجبنة المتبلة في الفلانتين إللي فات
روز: أمير أنا بجد زهقت منك .. إنت حد بخيل ومش بتحبني .. إنت ليه مش بتعزمني مثلا في كافيه
أمير: إيه إنتي عارفة تمن إزازة الميا في الكافيه كام .. 7 جنييه ليييييه
روز: بقيت 8 على فكرة
أمير: كمان .. أنا اخري أعزمك مرة في السنة على كوباية شاي في القهوة إللي بتعرض الشامبيونز لييج
روز: أوف .. أنا زهقت منك بجد
أمير: طيب باقولك إيه .. إنتي مش عايزة تخرجي .. ما تيجي معانا التلات أيام إللي جايين .. الواد رامي صاحب ريهام عزمني في فيلة باباه .. عامل تلات حفلات .. كل يوم حفلة .. ما تيجي معانا
روز: لا أنا بجد زهقت أوي من جو الحفلات بتاعكم ده .. جو مقرف كله شرب وسهر
أمير: يا سلام من إمتى .. ما إنتي طول عمرك بتحبي الجو ده
روز: أيوة بس بجد زهقت منه .. نفسي أعرف ناس محترمة .. فاهمني .. إنت عارف نفسي بجد أطلع مؤتمر تبع الكنيسة
أمير: إيييييه! لا مش ممكن .. روز .. روز بتقول كده ، لا لا مش مصدق
روز: ليه بقى إيه المشكلة لما أروح مؤتمر
أمير: يا ستي مفيش مشكلة .. روحي مؤتمر والدير والكنيسة وإعملي إللي إنتي عايزاه .. وتعالي معانا الحفلات برده
روز: لا بجد مش عايزة اروح
أمير: أيوة بس كده في مشكلة كبيرة أوي .. لا إنتي لازم تيجي
روز: ليه بقى لازم .. وبعدين مشكلة إيه؟
أمير: إيييه .. أصل أنا قلت للناس كلها إنك جاية معايا الحفلة .. يعني قلتلهم إن فيه بنت حلوة أوي جاية معايا ..لا وقايلهم كلهم إن اسمها روز.. وكده شكلي هيبقى وحش أوي بجد
روز: يا سلام .. وإنت بقى عمال بتعمل نمرة قدام صحابك الصيع على حسابي
أمير: الله وأنا إيش عرفني إنك ناويتي تتوبي ومش جاية
روز: انسى يا أمير .. ديه مشكلتك ، أنا مش جاية يعني مش جاية
أمير: بلييز
روز:نو
أمير: بليييز
روز: نو
أمير: يادي النيلة .. إنتي حرة يا روز ، انا ماشي
تدخل داليا
روز: امشي ماشي باي
داليا: إيه ماله أمير؟
يرجع أمير
أمير: إيه ده انتي تعرفيني بجد .. ده أنا بقيت مشهور بقى.. متعرفناش يعني
روز: ارجع واتلم .. ديه داليا صاحبتي
أمير: الله .. تبقى صاحبتي انا كمان
داليا: مالك!
أمير باقولك إيه ماتجبيها معانا الحفلات
روز: (بصوت واطي) بقولك إيه ابعد عنها .. ديه ملهاش في الجو ده خالص .. ديه من البنات بتوع ربنا والكنيسة والجو ده .. فاخلع بدل ما أفضحك هنا قدامها
أمير: أوف .. دايما كده بتحبطي مشاعري الجياشة
يخرج أمير
داليا: ماله أمير؟
روز: سيبك منه .. إيه كنتي عايزاني في إيه؟
داليا: مخنوقة أوي يا روز.. مخنوقة بجد .. بابا مصمم يطلعني مؤتمر كده تبع الكنيسة بكره وأنا بجد مش عايز أروح
روز: ومين سمعك .. أنا كمان الواد أمير مصمم يخليني أروح تلات حفلات من بكرة وأنا مش عايزة
داليا: حفلات إيه؟
روز: حفلات في فيلا الواد رامي .. كل يوم حفلة .. بس أنا بجد زهقت من الجو ده
داليا: محدش عاجبه حاله
روز: باقولك إيه أنا جاتلي فكرة.. إحنا هنبدل .. إحنا لسه صغيرين ومطلعناش بطايق.. انا هروح المؤتمر على إني داليا .. وإنتي هتروحي الحفلات مع أمير على إنك أنا (روز)
داليا: فكرة حلوة أوي .. أيوة بس أنا هابات فين .. المؤتمر في بيات
روز: عند ريهام صاحبتي .. هتروحي وترجعي معاها.. وأنا هقول لماما إني بايتة عند ريهام التلات أيام دول .. أنا ياما عملتها
داليا: حلو أوي الكلام ده .. وكده كده أنا محدش يعرفني في المؤتمر ده .. فمفيش مشكلة.. بس ثانية .. مين من الناس إللي في الحفلة هيبقي عارفني
روز: هم تلاتة .. أمير إللي إنتي رايحة على إنك صاحبته وريهام ورامي صاحب الفيلا .. الباقي هيبقي فاكرك اسمك روز فعلا
داليا: تمام ... الفكرة عجبتني.. يلا بينا
يخرجوا
المشهد الثالث:
يدخل كل من بيتر وأندرو وداني ومارك
بيتر: يا جدعان هو المؤتمر ده كله وعظات .. مفهوش لعب خالص
أندرو: لا مفهوش .. بس بص على الجانب الإيجابي .. فيه بنات جديدة..يعني بنات غير إللي إحنا متعودين كل يوم بنشوفهم من وإحنا في إبتدائي
داني: صح ده إحنا سوف نهيص ..و نظبط بقى .
بيتر: لا وإنت بتعرف تظبط كويس أوي ياض يا داني .. خلينا ساكتين
أندرو: عيب يا ابني .. داني رهيب في التظبيط .. إنت مش بتشوفه لما يحاول يتعرف على بنت .. بيبقى كوميدي اوي .. رهيب .. تحسه في نشرة أخبار
داني: ماشي يعني هي الحفلة عليا انهارده .. تمام .. طاب تشوفوا اني هقدر اتعرف على اي بنت جديدة في المؤتمر ده .. ده انا هبهركوا.
بيتر: لا ما انت هتبهرنا فعلا
داني: طيب ماشي .. خليكم فاكرين .. بس اول بنت جديدة حلوة انا اللي هحاول معاها محدش ليه دعوة بيها اتفقنا
اندرو: اتفقنا .. وعيل اللي يرجع في كلامه
بيتر: امين
تدخل نانسي
نانسي: ها عملتوا ايه في تفسير ال12 اصحاح اللي مفروض نسلمهم
اندرو: 12 اصحاح ايه؟
نانسي: اللي مفروض نسلمهم كفريق في المؤتمر ده؟
بيتر: فريق ايه؟
نانسي: يا جماعة ركزوا معايا شوية .. في المؤتمر ده كل فريق مفروض يسلم تفسير 12 اصحاح من سفر اشعياء .. يعني مفروض نكون ابتدينا
اندرو: يالهوي كل ده حصل
داني: سيبك منهم يا نانسي .. ديه عيال مهملة مش بتهتم بالكلمة ومش بتلهج فيها .. انا هقدر اساعدك لو احتاجتي اي حاجة
بيتر: حنين اوي
نانسي: ايه ده انت قريت ال12 اصحاح يا داني
داني: طبعا بالتأكيد .. ده انا قريتهم هم والتفاسير المختلفة .. لا وقارنت بينهم كمان وتوصلت لتفسير خاص بي يعبر عن شخصيتي وكينونتي الروحية
اندرو: هو انا مش كنت سالتك ع الحوار ده .. قولتلي متعرفش حاجة انت بتحور عليا
داني: ايه انت بتتهمني اني بفرق في المعاملة بين اصدقائي من الاناث والذكور .. لو سمحت ده اتهام انا ارفضه جملة وتفصيلا
بيتر: داني متستهبلش .. احنا بنتهمك انك بتستعبط علينا
نانسي: طيب ما علينا .. انا رايي اننا نبقى فريق مع بعض .. هم 12 اصحاح .. كل واحد ياخد اصحاحين
بيتر: ايوة بس كده هيتبقى اصحاحين
نانسي: ما احنا محتاجين بقى ندور على اي حد تاني يدخل معانا في الفريق
تدخل روز (اكنها داليا)
اندرو: ايه ده .. مين ديه
داني بيبلم
بيتر: داني انت تعرفها ؟
داني: وهل لطالب الهوى ان يلقى البدر وهو خاوي اليدين وبلا شعاع نور في الحياة
اندرو: ايه ده يعني ايه الكلام ده؟
مارك: ايوة انا فهمت .. هو معرفش يغسل ايديه في الحمام عشان النور كان بايظ
نانسي: طاب ايه هنفضل في حالة ال(تبليماشن) ديه كتير
داني: بقولكم ايه .. احنا كنا اتفقنا .. انا الاول.. وهتشوفوا هبهرها ازاي
بيتر: ورينا يا عم الجامد
داني يذهب لروز
داني: صباح الاشراق والامل
روز: نعم!
داني: صباح الخير
روز: صباح النور
داني: انا اسمي داني .. اخوكي في الرب
اندرو: ههه .. طلعوا اخوات
روز: هاي .. انا روز .. ايه .. داليا .. اسمي داليا
داني: الله .. اسم جميل وشاعري وملئ بالاحساس
روز: ميرسي
داني: انا لاحظت انك واقفة وحيدة .. ولمحت نظرة حزن من بعيد في عينيكي .. فقلت اجي اشوف يعني لو محتاجة تفتفضي
روز: نظرة ايه يا بابا؟!
داني: نظرة حزن وتعاسة
روز: اه .. طاب باقولك .. جو نظرة حزن وعينيكي ده تعملو على حد تاني .. انت اصلا فيك جدا .. ومكشوف .. وعيب انك تفكر تعمل كده في المؤتمر
اندرو: داني اتبهدل يا جدعان
تذهب نانسي لروز وداني لتلحق الموقف
نانسي: هاي .. انا نانسي .. وده داني صاحبنا وبيحب يهزر معلش .. ايه اعرفك بيتر واندرو
اندرو: بونجور
روز: هاي انا اسمي داليا
بيتر: ايه انتي دخلتي في فريق ولا لسه؟
روز: فريق ايه؟
نانسي: انا هاقولك .. اصل احنا (يقاطعها داني)
داني : مطلوب مننا نتقسم فرق
روز: ثانية واحدة .. هي مش كانت بتشرح .. انت بتقاطعها ليه .. حد سمحلك تتكلم.. اتفضلي كملي يا نانسي
بيتر : يا جدعان داني اتبهدل لتاني مرة
نانسي: كل فريق مطلوب منه يفسر جزء من سفر اشعياء
روز: سوري بس ايه سفر اشعياء
بيتر: ده سفر في العهد القديم
روز: ايه العهد القديم؟
اندرو: ثانية هو انتي حتى مش عارفة العهد القديم
روز: اصل انا عمري ما كنت بحضر كنايس وكده .. طول عمري ليا (ماي فريندز) من بره الكنيسة وبقي وقتي كله حفلات وكافيهات وكده
نانسي: اه يعني مش زينا .. طيب نسيبك احنا بقى .. سوري اصلنا مش بنصاحب غير المؤمنين اللي زينا
روز: مش فاهمة يعني ايه
بيتر: لا ده موضوع طويل .. نبقي نشرحهولك بعدين
يرحلوا جميعا ما عدا داني .. يعود بيتر لياخذه
روز: ايه ده في ايه .. هم للدرجة مجتمع مقفول .. ما علينا انا هعرف ازاي ادخل وسطهم .. ما هو اصل اكيد مش هاقضي التلات أيام لوحدي يعني
المشهد الرابع :
يدخل كل من مايكل وسمير وريهام ورامي وستيفن
رامي : منورين الفيلا يا جدعان .. وكر الخطية والبلاوي كلها
ستيفن: صدقني يا رامي احنا مش عارفين من غير فيلتك كنا هنصيع ونضيع ازاي
سمير: اه كان زمانا محترمين بقى وحاجة يع كده خالص
مايكل : اه صح .. عندكم حق .. بس بقى وجت الفيلا
ريهام:فيلا ايه ديه يا ابني اللي جت
مايكل:الفيلا .. خلصت امتحانها وجات
ستيفن: يا ابني انت مش هتبطل الهباب اللي بتشربه ده؟
مايكل: وابطل ليه .. طالما انا باخده ومبسوط
رامي: يا جدعان .. مشوفتوش البنت الروسية اللي بلعب معاها قمار دلوقت ع النت .. رهيبة .. جامدة جدا
ستيفن: يا ابني احترم نفسك بقى ريهام قاعدة
ريهام: لا عادي هو مش بيحترمني اصلا .. وبعدين شوف مين اللي بيتكلم .. ستيفن اللي كل يوم مع واحدة!
ستيفن: لو سمحتي .. انا كل يوم مع واحدة اه بس واحدة مصرية .. مش اجنبية
سمير: كده ماشي يعني .. انا بقى مليش في جو البنات ده
رامي: طبعا وانت فاضي .. ما انت كل يوم في خناقة شكل .. يا راجل ده انت حتى المدرسين بتتخانق معاهم وتضربهم!
سمير: لا اللي نفسي اشوفها بجد ، صاحبة امير اللي بيقول عليها .. هموت واشوفها
رامي: اه .. ده الواد امير بيحكي عنها أساطير.. بيقول اسمها روز باين
مايكل: ايوة دي جامدة جدا
ستيفن: انت شوفتها يا مايكل
مايكل: لا طبعا
سمير: شوفت صورتها طيب
مايكل: لا طبعا
ستيفن: مش فاهم امال عرفت منين انها جامدة
مايكل: احساسي
رامي: مايكل .. بس .. بس طالما وصلت للمرحلة ديه متكملش
يدخل امير وداليا
امير: ساء الخير عليكم يا رجالة .. ايه يا رجالة وريهام
ريهام : ايوة كده اتعدل.. روز اخيرا شوفناكي .. ده امير بيحكي عنك حكايات
ستيفن: هو انتي فعلا سافرتي امريكا واستراليا وكندا واوروبا زي ما امير بيقول
رامي: لا واخدتي ملكة جمال الشرق الاوسط السنة اللي فاتت
ريهام: امير كمان قالنا ان باباكي بيشتغل لواء في الداخلية
داليا: ايه !! اه اه .. طبعا طبعا .. (لامير) ده انت ليلتك سودا معايا
رامي: طيب احب اعرفك على الشيلة .. خيرة شباب اعدادي .. انا رامي .. صاحب الفيلا .. غني اوي .. وصاحب ريهام .. حريف لعب قمار .. بعشق الافلام الاجنبي .. خصوصا الأفلام قليلة الأدب
داليا: الافلام ايه؟
رامي: قليلة الادب
داليا: اه يعني انا سمعت صح .. بداية جميلة
سمير: سيبك منه .. ده مش محترم ده .. انا بقى سمير..بلا فخر بلطجي شبرا الأول .. اي حد يضايقك يا عروسة قوليلي وانا افتحلك دماغه
ريهام: ايه وانا ريهام .. اهلا بيكي
داليا: اهلا
ستيفن: انا بقى ستيفن .. حساس الجيل .. ومحطم قلوب البنات .. دنجوان الشلة
امير: بس يا ستيفن .. شكرا .. ده بقى بالذات ملكيش دعوة بيه
داليا: اشمعنى
ريهام: مفيش اصله حطم الرقم القياسي .. صاحب 10 بنات الشهر اللي فات .. كل بنت 3 ايام واقلب
داليا: اه بتاع بنات يعني
ستيفن: ايه ده .. مسمهاش بتاع بنات .. اسمها بيقدر الجمال
داليا: يا كوكو
امير: ده بقي مايكل .. مدمن مخدرات .. لذيذ جدا .. مش هتفهمي منه اي حاجة
مايكل: انا مبسوط اني شفتك يا سميرة
داليا: سميرة مين؟
مايكل: مش انتي اللي جاية تصلحي التلاجة
ستيفن: لا مايكل .. اوعي تركزي معاه .. ركزي معايا انا
داليا: ايه ده في ايه!
رامي: بقولك ايه ما تيجي تدخلي معانا سينما بكره
داليا: هو انا عمري ما دخلت سينما .. بس ماشي اوك .. واضح اني هحتاج اتنازل عن مبادئ كتير هنا .. انتو هتخشوا فيلم ايه؟
سمير: في فيلم للكبار فقط نازل معدي
رامي: ايوة بقى يلا بينا
داليا: ايه ده .. اكيد مش هدخل معاكم فيلم زي ده .. انتو ازاي متخيلين اني هوافق على حاجة زي كده
امير: معلش اصلها .. ملهاش في الجو ده
ستيفن:سيبك منهم .. انا بقى هروح فيلم كرتون محترم وجميل .. تيجي معايا
امير: ولا ليها في الجو ده كمان ابعد انت
داليا: ثانية واحدة .. انت قصدك نخرج لوحدينا
ستيفن: ايوة كده خليكي معايا ع الخط
داليا: انت قليل الذوق .. انت ازاي تتخطى حدودك معايا كده
رامي: مالك يا ماما في ايه .. هبة فينا كده ليه .. ما تخدي بالك من كلامك
امير : معلش هي متقصدش
داليا: لا اقصد .. انتو اصلا ناس غريبة اوي بالنسبة ليا .. مبسوطين اوي بالغلط اللي بتعملوه
امير: خلاص يا روز
داليا: انت بالذات تسكت خالص .. هم دول اصحابك اللي هتعرفني عليهم
سمير: لا باقولك احنا ساكتينلك احتراما لامير
امير: شكرا شكرا
سمير: انما هو اصلا ملوش لزمة بالنسبة لنا
امير: ايه الاحراج ده
سمير: كلمة كمان ومحدش هيسكتلك
ريهام: طيب طيب .. ممكن تسيبوني اتكلم معاها شوية .. انا هعرف اتفاهم معاها
رامي: ياريت .. جايبنلنا واحدة من الدير معاه
امير: الله وانا مالي انا
مايكل: صح .. انت عندك حق يا امير
امير: شوفته .. يا حبيبي يا مايكل
مايكل: لا تصدق .. هم عندهم حق .. انت الغلطان يا امير
امير: يادي النيلة
سمير: يلا بينا يا رجالة نسيبهم يتكلموا مع بعض
يخرجوا ماعدا امير
داليا: انت ايه مسمعتش هو قال ايه.. يلا بينا يا رجاله
امير: ايه ما انا مفروض صاحبك يا داليا ..انتي نسيتي
داليا: انت .. ده انت هتشوف ايام سودا .. بقى بتكدب عليهم وتقول مش عارف بابا لوا وسافرت برا .. ده انا هخلي روز تعمل منك كفتة مشوية
امير: الله .. مش كنت بتفشخر بروز .. بريستيجي بريستيجي
ريهام: بس يا امير.. عشان هي فعلا عندها حق .. ممكن تسيبنا من فضلك
امير: محدش مقدرني هنا
يخرج امير
ريهام: ايه بقى يا ست داليا .. هديتي خلاص
داليا: مش اوي .. مش ممكن أنا بجد اتفاجئت .. انا معرفش ان حياة روز بايظة اوي كده .. طول عمري عايشة وسط مجتمع الكنيسة والمؤمنين .. مش متخيلة ان العالم بره عامل كده
ريهام: معلش انا مقدرة اللي انتي فيه .. روز حكيتلي انتي مين .. بس لازم تحاولي تتأقلمي
داليا: المشكلة اني عشان اتأقلم لازم اعمل حاجات انا ضدها .. اوك انا كان نفسي اخرج من جو الكنيسة واشوف الناس بره ، بس من غير ما اعمل حاجة بالنسبة لي غلط
ريهام: ما هو ده بقى التحدي اللي قدامك .. ازاي هتعيشي التلات ايام اللي جاية وسطينا من غير ما تبقى زينا .. بس الموضوع محتاج حكمة .. مش هينفع العصبية اللي انتي فيها ديه
داليا: عندك حق انا اسفة .. انا لازم اصالحهم واهدى شوية
ريهام: برافو عليكي .. وعامة ماتخفيش انا هساعدك
داليا: شكرا .. بس هو انتي بتعملي كل ده عشان روز؟
ريهام: مش بس عشان روز.. انا زيك يا داليا .. كنت الاول بحاول اعمل فاصل بيني وبين الغلط ..بس فشلت .. الاول الموضوع بدأ بتنازل بسيط وبعد كده اكبر واكبر .. لحد ما بقتش قادرة ابطل غلط .. بقيت من علاقة لعلاقة .. مش قادرة ابطل .. نفسي تنجحي في اللي انا فشلت فيه
داليا: فاهماكي اوي
ريهام : يلا بينا عشان نعتذرلهم
داليا: يلا بينا
المشهد الخامس:
يدخل مايكل وسمير ورامي وسيفن
رامي: البنت ديه لازم تلزم حدودها
سيفن: اهدى شوية يا ستيفن .. شكلها محترمة وملهاش في الجو بتاعنا ده بالراحة
سمير: باقولك ايه مش طالبة جو الحنية بتاعك ده خالص .. انا مش طايقها اصلا
مايكل: يا جماعة لازم .. ناخدها بالراحة .. مش هينفع الغشومية ديه
ستيفن: ايه ده ولا يا مايكل .. انت فوقت!
مايكل: اه .. هم ساعتين .. وبعد كده هرجع لغيبوبتي تاني
رامي: لا ده احنا لازم نلحقك وانت فايق بقى .
يدخل كل من ريهام وداليا وامير
امير: شوفتوا رجعتها معايا عشان تعتذرلكم
داليا: ايه ده .. ريهام هي اللي جابتني مش انت
امير: يالهوي .. كفاية احراج بقى ..كفاية
داليا: انا اسفة يا جماعة .. انا كنت سخيفة معاكم اوي
ستيفن: ولا يهمك .. احنا مسامحينك .. انتي تؤمري
امير: يا ابني اهدا بقى .. اهدا .. ايه قفص جوافة واقف انا
ريهام: ستيفن اهدى شوية معاها.. اهدى واتعامل عادي
ستيفن: احم حاضر
سمير: ايوة يعني هتيجي معانا السينما في الاخر ولا لا
داليا: لا .. بصراحة مش عايزة .. بس ايه رايكم نلعب هنا افلام
ريهام: انا موافقة
امير: وانا
رامي: يلا بينا
سمير: اوك .. انا وداليا ورامي ومايكل فريق .. وستيفن وامير وريهام فريق
رامي: ماشي .. واحنا اللي هنبتدي .. امير تعالي عشان انت اللي هتمثل .. ريهام وستيفن استنوا بره
يخرج ريهام وستيفن
داليا: انا عندي فيلم غريب جدا محدش شافه .. ايه رايكم في فيلم قديم اسمه حافية على جسر من ذهب .. صعب اوي صح؟
سمير: بجد ده اخرك في الصياعة .. ده سهل واتجاب مليون مرة
مايكل: بس انا عندي فكرة .. احنا نجيب اسم فيلم من كلمة واحدة مش معروف .. يكون فيلم من كلمة ملهاش معنى وبطله مش معروف .. ويا سلام لو أيام الثورة مثلا كمان .. اخر الدراسات بتثبت ان الافلام اللي من كلمة واحدة من الصعب ان الواحد يفتكرها .
داليا: يا لهوي .. ده فاق اخيرا
رامي: اه لا خلي بالك .. مايكل لما بيفوق بيبقى خطير .. البروفيسور بتاعنا
سمير: طيب فيلم زي ايه
مايكل: ريجاتا .. في فيلم اسمه كده فعلا
رامي: حلو ده
امير: يلا يا جدعان
سمير: بس احنا اخترنا فيلم "ريجاتا"
امير: فيلم ايه؟
مايكل: ريجاتا
امير: لا ياجماعة متهزروش .. امثله ازاي ده
داليا: الله واحنا مالنا .. اتصرف .. هي اللعبة كده
امير: ماشي .. يا ريهام ، يا ستيفن يلا
يدخلوا ويحاول امير التمثيل ويفشل ستيفن في التخمين
ستيفن: حمام .. ايه مزنوق
ريهام: امساك
ستيفن: سيفون .. بواسير
رامي: تايم
امير: ريجاتا .. ريجاتا يا جدعان .. عمال اعملكم كده .. ري .. ري . وكده يعني بيسوق زي لعبت جاتا .. انتو اغبيا اوي
ستيفن: اه تصدق مجبتهاش ازاي ديه
ريهام: احنا اللي ضايعين فعلا
رامي: واحد صفر لينا .. يلا دوركم .. بس ثواني هنتفق احنا على حاجة
ستيفن: ماشي واحنا هنروح نتفق ع الفيلم
مايكل: بقولكم ايه انا عندي فكرة .. داليا امسكي الورقة ديه .. اول ما يقولولك اسم الفيلم .. سمير هيتخانق مع ستيفن .. ورامي يدخل في النص .. وهما مش واخدين بالهم تديني الورقة اللي فيها اسم الفيلم
داليا: ايوة بس ده غش
رامي: لا باقولك ايه .. جو الملاك ده اطلعي منه .. عايزين نكسب
داليا: ماشي
يدخل الثلاثة الاخرين
ريهام تقول لداليا اسم الفيلم بصوت واطي
سمير: ولا يا ستيفن .. انا متاكد هيطلع اسم فيلم غبي زيكم
ستيفن: في ايه يا سمير ما تحترم نفسك
سمير: ايه انت بتقوللي انا كده
ستيفن: اه يا عم
يتخانقوا كلهم والباقي يحوش .. اثناء الخناقة تكتب داليا اسم الفيلم وتعطيه لمايكل
تخلص الخناقة
سمير: خلاص يا عم انا اسف
ستيفن: ما كان من الاول
داليا: ما علينا يلا هبدا تمثيل
بمجرد ما تبدا يجاوب مايكل
مايكل: كازبلانكا
امير: ايه ده لا انتو بتغشوا . ازاي يعني عرفته على طول كده
ستيفن: ايوة انتو اكيد بتغشوا
ريهام: ايوة .. بقولك ايه داليا تقدري تحلفي انكم مغشتوش
داليا: ايه انا مبحلفش
امير: لا انتي عشان عارفة انكم غشيتوا
ريهام: صح انتي لو واثقة انكم مغشتوش مش هتحلفي
داليا: صدقيني بجد مغشيناش .. انا فعلا مبكدبش .. مغشناش بجد
ريهام: اوك
رامي: باقولكم ايه انا جعت يلا ناكل
ستيفن: يلا بينا .. بس انا برده متاكد انكم بتحوروا
يخرجوا جميعا
المشهد السادس:
يدخل بيتر وداني واندرو
بيتر: وبعدين بقى في حوار الاسكتش ده هنعمل ايه.. انا كنت فاكر ان المسابقة هتبقى كلها على اسئلة في الكتاب المقدس .. مكنتش عارف انه هيبقى مطلوب مننا كمان اننا نعمل اسكتش
اندرو: هو لو على الاسكتش مش مشكلة احنا بنعرف نمثل .. انما المشكلة ان لازم يبقى فيه بنت
داني: طاب ايه رايكم نقول لنانسي تمثل معانا .. هي مش معانا في الفريق؟
بيتر: يا سلام جبت التايهة انت كده .. مش عارف الحقيقة من غيرك كنا هنعمل ايه ! يا ابني ما نانسي بتكره التمثيل وانت عارف كده كويس .. معتقدش هنقدر نقنعها
داني: يا عم نجرب .. يمكن توافق.. بس لازم الاول نثبتها .. بصوا انا هثبتها ازاي واتعلموا
بيتر: تصدق انا كده قلقت
اندرو: يا ناااانسي .. يا نانسيييييي
تدخل نانسي
نانسي: ايه ايه في ايه .. عايزين ايه
داني: ايه ده انتي خاسة اوي انهارده .. لا حقيقي .. انتي بتعملي رجيم؟
نانسي: ايه ده بجد .. بتهززرررررر.. يا داني ميرسي اوي .. انت بجد اخويا اوي
داني: بغض النظر اني شكلي هفضل محشور كده في (الفريندزون) كتير .. اوي .. ما علينا ممكن كاخ يعني اطلب منك طلب
نانسي: اه طبعا اتفضل
داني: ممكن تمثلي معانا في الاسكتش ؟
نانسي: ممم افكر .. بص انا مش بحب التمثيل انت عارف. بس معنديش مانع اجرب
بيتر: بجد!! عاش يا داني بجد.. طاب حلو اوي .. بصي احنا هنعمل اسكتش عن الخطية والادمان ، وكان فيه دور بنت مدمنة نفسنا تعمليه .. ايه رايك
نانسي: (بغضب) .. ايه!! لا طبعا مستحيل .. انتو ازاي اصلا تتجرأوا وتطلبوا مني حاجة زي ديه
اندرو: يا ستي هو احنا بنقولك ادمني بجد ... ده تمثيل تمثيل يعني كده وكده
نانسي: اه ما هي بتبدي كده .. خطية صغيرة .. وبعد كده تفضل تكبر تكبر تكبر .. لحد ما ابقى مدمنة بجد واضيع .. واسيب ربنا وابقى من اهل العالم .. انا مينفعش اصلا يبقى لي اصحاب مدمنين زيكم
داني: مدمنين ايه .. ده تمثيل .. صدقيني تمثيل .. انتي هتلبسينا مصيبة .. وبعدين ايه الاوفرر ده .. ده اسكتش في مؤتمر .. هو احنا رايحين ديسكو في لاس فيجاس
نانسي: انسو انا لا يمكن اعمل الدور ده .. انا اعمل دور ملاكة ، برنسيسة ، قديسة .. كده
داني: تصدقي احنا غلطانين اننا سالناكي .. اه وعلى فكرة بقى انتي مخستيش ولا حاجة .. انتي تخنتي سته كيلو
تدخل روز
روز: ايه صوتكم عالي كده ليه؟
داني: ايوة ، اخيرا لقينا اللي هينقذنا .. واو يا داليا انتي خسيتي اوي
بيتر: حافظ مش فاهم
روز: خسيت ايه انت هتمثل .. انت ديه مرة تشوفني اصلا .. وبعدين انا مش عايزة اخس ومش فارق معايا.. افصل حوارات وتعالي بفتيسك كده دغري معايا وقول المراد
داني: ايه يعني ايه ؟ اعمل ايه
روز: عايز ايه يا داني؟
اندرو: شكلها بتتكلم بالشفرة
بيتر: احنا عايزينك تمثلي معانا اسكتش
روز: بجد انتوا هتعملوا اسكتش .. الله .. انا معاكم طبعا .. انا بعشق التمثيل اصلا
اندرو: بس هتوافقي تتاخدي دور بنت مدمنة
روز: اه وايه المشكلة .. ده تمثيل
داني يغيظ نانسي
بيتر: شايفة الناس اللي بتفهم
روز: بس ثانية .. الاسكتش ده محتاج تدريب .. وانتوا كنتوا بتقولوا انكم مش هتتكلموا معايا خالص لاني مش مؤمنة
داني: لا احنا رجعنا في كلامنا خلاص
نانسي: يا سلام دلوقتي!
بيتر: يا ستي احنا عيال اندال ملناش كلمة انتي ايه اللي مضايقك
نانسي: كده طيب براحتكم انا ماشية
روز: استني يا نانسي .. انا جايه معاكي
تخرج روز ونانسي
بيتر: تصدقوا احنا كنا غلطانين لما رفضنا نتكلم معاها المرة للي فاتت
اندرو: عندك حق
داني: صحيح صحيح
بيتر: فعلا مش كل حد من بره مجتمعنا يبقى وحش .. فيه ناس كويسة بس معندهاش الفرصة
اندرو: يا حنين
بيتر: تصدقوا انا غلطان اني بتكلم جد مع امثالكم .. انا ماشي
اندرو: استني هنيجي معاك
المشهد السابع:
روز: الموضوع بجد صعب اوي يا داليا .. اصعب بكتير من اللي تخيلته
داليا: صعب .. ده مستحيل
روز: ليه .. هو انتي برده حصلتلك مشاكل مع شلتي .. ده انا قلت امير هيساعدك ويظبطك
داليا: امير! متفكرنيش .. ده ضايع .. ده مفهمهم انك باباكي لوا وسافرتي 13 بلد .. ده موديني في داهية
روز: ليلتك سودا يا امير .. انا عارفة هعاقبه ازاي .. انا هخده مع شلة كلها بنات بيشتروا لبس .. ونخليه يفضل يلف يلف يلف معانا
داليا: بس بجد يا روز .. انا اتعلمت كتير اوي من التلات ايام دول .. طول عمري بشوف نفسي البنت المؤمنة المختلفة اللي بتعرف تقول للغلط لا .. بس اتضح اني عايشة بوشين .. مع اول اختبار لقيت نفسي بعمل الغلط
روز: غلط ايه .. هم العيال ديه خلوكي تعملي ايه؟
داليا: خلوني اغش واكدب .. الاتنين .. لما حسيت اني محدش شايفني من اصحابي والقادة في الكنيسة لقيت الغلط بالنسبة لي سهل اوي .
روز: ايوة بس معنى كلامك ان الحل انك تبعدي عن الناس ديه خالص .. تبقي عايشة منعزلة في شلة في الكنيسة زي صحابك .. وده صعب اوي
داليا: صح .. الموضوع محتاج توازن .. محتاجة تبقى قادرة تتعاملي عادي مع كل الناس بس مش بتعملي زيهم الغلط .. تبقي عايشة وسطيهم بس الناس الاقرب منك هم اللي زيك اللي ليهم علاقة حقيقية بربنا .
روز: ايوة بس ازاي يا داليا هتبقي بتتعاملي معاهم ومش بتعملي الغلط زيهم ؟
داليا: ده محتاج يبقي ليكي علاقة حقيقية بربنا .. مش مجرد انك اتولدتي جوه مجتمع كنيسة ومؤمنين
روز: عندك حق .. انا اخدت بالي لما عشت وسطيهم تلات ايام في المؤتمر .. في ناس حقيقي بيحبوا ربنا وقريبين منه .. وفي ناس تانية هم بيمثلوا انهم بيحبوا ربنا .. لكن هم بس وسط اصحابهم
داليا: بس انتي ايه المشاكل اللي حصلتلك
روز: المجتمع مقفول اوي يا داليا .. عشان تبقي صاحبتهم وواحدة منهم الموضوع بجد صعب .. انتي عارفة انهم في الاول مكنوش عايزين يتكلموا معايا ..ومبداوش يتكلموا معايا غير لما كانوا عايزين مصلحة .. بصي انا قادرة افهم انهم يبقوا عايزين يحافظوا على نفسهم وميتجروش للغلط .. بس ده لما هم يبقوا بين الناس التانية زي اللي حصل معاكي .. انما لما يكون حد هو اللي جايلهم وعايز يبقى وسطيهم المفروض يساعدوه انه يعرف ربنا مش يطفشوه
داليا: صح ... انتي صح .. عامة انا شايفة ان التجربة كانت كويسة بالنسبة لنا احنا الاتنين .. الواحد محتاج انه يشوف غيره بيفكر ازاي دايما .. باحلم باليوم اللي نبقى قادرين نعيش حقيقين وسط العالم زي وسط الكنيسة
روز: واللي نكون قادرين نقبل فيه غيرنا وسطينا
داليا: ساعتها بس هنبقي بنعيش ايمانا بالرب يسوع اللي بنقوله على ارض الواقع
اجتماع اعدادي – جمعية خلاص النفوس شبرا
©www.madareselahad.org