الرئيسية » مسرحيات » اسكتشات

مسرحية : الحل عندك

الشخصيات: مارك، والدة مارك، سامر، فادي ،نورا، ايفا، جورج ، شادي، معلمة مدارس الأحد و معلمة المدرسة

 

المشهد الأول: في منزل مارك(تظهر الأم علي المسرح )

ماما: يا مارك يا مااااارك

(يدخل مارك مسرعا يحمل حقيبة المدرسة و هو يحاول أن يرتدي الحذاء)

مارك: أيوة يا ماما مالك بتزعقي ليه!!

ماما(بتعجب ) بتزعقي ليه!!! يا ابني الساعة قربت تبقي تمانية  وانت لسه مرحتش المدرسة! أتأخرت يا مارك!!

مارك: خلاص انا رايح أهه!! ماتقلقيش حاخدها جري!!(يخرج مسرعا )

ماما (بصوت عالي حتي يسمعها ) طب خد بالك من العربيات و بص يمين و شمال و أنت بتعدي الشارع!!

(محدثة نفسها ) ربنا يحافظ عليك يا حبيبي.

 

المشهد الثاني: في فناء المدرسة يقف مارك و معه سامر

سامر: انت النهاردة  لحقت الجرس قبل ما يضرب علي أخر لحظة!

مارك: بصراحة مكنتش ناقص أتذنب علي الصبح!!

سامر:المهم عملت واجب الإنجليزي؟ مستر ميلاد ناوي يخلي اللي معملش الواجب يكتبه عشر مرات!!!

(تأتي نورا و ايفا اليهم )

إيفا: مين اللي حيكتب الواجب عشر مرات؟؟؟ ها ها ؟؟

سامر: يا ساتر عليكي.. محدش حيتعاقب!

مارك موجه كلامه لنورا: آمال فين نضارتك يا نورا؟؟

نورا بحزن: انت ناسي اللي حصل يوم الخميس؟؟ جورج و شادي أخدوها مني بالعافية و جورج قعد يقلدني و انا لابساها فوقعت من أيده و أتكسرت.

سامر بغضب:أنا مش فاهم جورج ده بيتصرف كده ليه؟؟ يعني هو استفاد ايه لما عمل كده؟؟

إيفا: اليوم ده نورا عيطت جامد و معرفتش تركز في باقي الحصص!

مارك: معلش يا نورا. .متضايقيش نفسك!

سامر: ياريتنا أفتكرنا حاجة حلوة...شوفوا مين جاي علينا!!

(كلهم ينظروا إتجاه جورج و شادي)

جورج: ازيكم؟؟ ايه ده أم أربع عيون معاكم؟؟

 (يضحك هو و صاحبه شادي )

مارك بغضب: أيه اللي انت بتقوله ده يا جورج؟؟ و ايه اللي بيضحكك يا شادي؟؟ عمر ما كانت التريأة علي الناس و أذيتهم حاجة ظريفة و مضحكة!

جورج بغضب : و انت مالك ؟  ايه اللي دخلك في الموضوع؟؟؟و بعدين براحتي !! أنا أعمل اللي علي مزاجي!!

ايفا: إيه هو اللي براحتك ؟؟ملكش دعوة بينا!!

شادي: اسكتي أحسن بدل ما جورج يخليكي تعيطي زي صاحبتك!!

(ضحك جورج و شادي بصوت عالي)

مارك موجه كلامه لأصحابه: يا للا بينا مفيش داعي نقف هنا!

(يذهبوا كلهم و يبقي شادي و جورج )

جورج بغضب : هو مارك ده فاكر نفسه حيقدر عليا؟؟ بيحرجني قدام أصحابه!!

شادي: يا عم سيبك منه ..

جورج بغضب: لأ طبعا مش حأسيبه  و حأحرجه زي ما أحرجني!

شادي: حتعمل ايه يعني؟؟

جورج:تعالي معايا و أنا حأوريك.

(يخرجوا من المسرح )

 

المشهد الثالث: مارك يظهر في فناء المدرسة يبحث عن شيء

مارك: أنا مش فاهم الشنطة دي راحت فين؟؟ اختفت فجأة يعني!!

(يظهر سامر مع نورا و ايفا و فادي)

فادي:أنا دورت في الحمامات و برضة ملقتهاش !

سامر: و احنا دورنا في الفصول برضة وملقنهاش! !

مارك: آمال حتكون راحت فين؟

(يظهر جورج و هو يحمل حقيبة مارك )

جورج: بتدور علي دي؟؟ (يلقيها الي شادي )

(يجري مارك ليأخذها من شادي فيعيدها الي جورج و يستمروا بينما يحاول أصدقاء مارك مساعدته )

جورج: تعبت يا مارك؟؟ علشان تاني تاخد بالك كويس وانت بتتكلم معايا! !(ثم يفتح الشنطة و يلقي بكل الكراسات و الكتب التي بداخلها علي الأرض)

(يجلس مارك علي الأرض و أصدقائه يحاولون مساعدته)

مارك و هو يبكي: أنا متضايق اوي!! كراريسي كلها اتبهدلت! !أنا عملتله ايه علشان يعمل فيا كده؟؟

فادي: ولا يهمك يا مارك احنا حنساعدك، و بعدين دي مش حاجة جديدة ..كل الفصل عارف حركات جورج السخيفة دي!!

ايفا: و لحد أمتي يعني محدش حيعرف يوقفه!!

سامر :بيخافوا منه علشان ميعملش معاهم اللي عمله في مارك لما دافع عن نورا.

ايفا: بس أكيد في حل!!

 

المشهد الرابع: فادي في مدارس الأحد

(المدرسة تصلي أبانا الذي مع الأطفال)

الميس: متنسوش يا حلوين حنسمع الأية المرة اللي جاية و اللي حيحفظ حياخد هدية جميلة اوي..ربنا معاكم

(يودع الأطفال المدرسة و يبقى فادي )

الميس: مالك يا فادي شكلك متضايق النهاردة.

فادي: بصراحة يا ميس في حاجة مضايقاني في المدرسة...ممكن أحكيهالك؟ ؟

الميس: طبعا يا حبيبي تعال قاعد و أحكيلي علي كل حاجة .

(يجلسون و يحكي لها عما يفعله جورج بأصدقائه  )

الميس: عارف يا فادي كل اللي انت بتحكيه ده إسمه تنمر!

فادي: يعني ايه تنمر يا ميس؟

الميس: يعني أنك تقصد تأذي حد و غالبا بيكون أضعف منك..تأذيه جسدياً تضربه مثلا أو تأذيه نفسيا بأنك تتعمد تتضايقه زي ما جورج بيعمل مع أصحابك في الفصل أو تقوله كلام جارح و تتريأ علي شكله أو لبسه أو طريقة كلامه! و علي فكرة التنمر ده ممكن يوصل الواحد انه يكره نفسه و يكره حياته كمان!

فادي: أنا متضايق اوي يا ميس من اللي بيحصل مع أصحابي، و مش عارف ايه الحل!

الميس: الحل عندك يا فادي!! أقف ضد اللي بيحصل ده..روح مع زمايلك و بلغ الميس باللي بيحصل علشان إدارة المدرسة تاخد موقف من جورج!

فادي :بس أنا بصراحة خايف أعمل كده يقوم جورج يحطني في دماغه ويعمل معايا زي ما عمل مع مارك!

الميس بإبتسامة: أنا فاهمة خوفك بس مين قالك انه مش ممكن يعمل معاك زي ما عمل مع صاحبتكم؟؟ هي كانت عملتله حاجة؟؟ لازم حد يوقف الولد ده عن التصرفات اللي بيعملها، و أقولك علي حاجة كمان الولد ده مش بالقوة اللي انتوا  متخيلينها. .ده من جواه شخصيته ضعيفة علشان كده بيحاول يستقوي بالحركات اللي بيعملها دي!

فادي بإستغراب :معقولة يا ميس؟؟

الميس: طبعا  ..أشجعك تروح انت و أصحابك تبلغوا  الميس في المدرسة و لازم مارك صاحبك يحكي لمامته اللي حصل معاه علشان جورج ده لو استمر في اللي بيعمله مامته تتدخل.

فادي: شكرا يا ميس...أنا حأعمل كده

الميس :و أنا حأصليلكم يا حبيبي و أبقي قوللي عملتوا ايه!

فادي : حاضر يا ميس ربنا معاكي

 

المشهد الخامس: في منزل مارك

ماما: يا مارك ياللا يا ابني حتتأخر المرة دي

(يظهر مارك و هو مرتدية البيجامة)

ماما بتعجب: إيه دا!!! أنت لسه ملبستش

مارك بضيق: أنا مش حأروح المدرسة النهاردة!

ماما: ليييييييييه؟؟ عندك إمتحان  و انت مش مذاكر؟ ؟

مارك: أبدا يا ماما

ماما: عيان؟؟

مارك :لأ برضة!!

ماما: أمال في ايه يا حبيبى. .قلقتني عليك؟؟

مارك: في ولد معانا في الفصل  علطول بيحب يضايق أي حد و أنا يوم الخميس قلتله انه اللي عمله مع صاحبتنا ده غلط..راح أخر اليوم قعد يلعب بشنطتي و بهدلي كتبي و كراريسي في حوش المدرسة .بإختصار فرج عليا المدرسة!!!

و أنا بصراحة مكسوف أروح المدرسة بعد اللي حصل.

ماما تحتضن مارك: أنا مبسوطة منك يا مارك و انت المفروض تكون فرحان بنفسك!

مارك: أزاي يعني؟؟

ماما: لأنك كنت شجاع و واجهت الولد ده بالحاجة الغلط اللي عملها و دافعت عن صاحبتكم. و علي فكرة هو اتضايق من شجاعتك علشان كده حب يضايقك  في أخر اليوم، لازم تروح المدرسة و تثبتله انك فخور باللي عملته و مش فارق معاك اللي هو عمله.

مارك: أنا مكنتش فاكر اني اللي عملته ده حاجة بتفرق كده.

ماما :لو مكانتش بتفرق مكانش هو أتغاظ منك و أكيد اللي انت عملته ده شجع صاحبتكم..الكتاب المقدس مليان بالشخصيات اللي عملت حاجات بسيطة لكنها كانت محتاجة شجاعة كبيرة و ربنا استخدمهم.

ياللا قوم غير هدومك بسرعة علشان متتأخرش اكتر من كده.

مارك:كلامك ريحني يا ماما..أنا حأروح ألبس بسرعة.

 

المشهد الأخير: في فناء المدرسة

(سامر و فادي و نورا و ايفا يتناقشوا  )

سامر : مارك اتأخرنا اوي..أنا خايف انه ميجيش النهاردة!

ايفا: ما هو بصراحة اللي حصل معاه كان سخيف جدا

فادي: بصوا بقي احنا لازم نوقف جورج ده عن التصرفات اللي هو بيعملها

نورا: يعني نعمل ايه؟؟

فادي: كان لازم يا نورا اول ما أخد منك نضارتك بالعافية تبلغ الميس علطول

سامر:بصراحة كان لازم تقوللي للميس عن كلامه السخيف عليكي و تريأته

نورا بخجل: بصراحة خفت منه!!

فادي: علشان كده هو مستمر في اللي بيعمله!! مارك كان شجاع و قال لجورج انه اللي عمله ده غلط..أحنا لازم نبلغ الميس باللي عمله جورج علشان ميأذيش حد تاني.

ايفا بحماس: أيوة و لما يلاقينا كلنا واقفين مع بعض مش حيعرف يعمل حاجة!!

نورا : و أنا معاكم

(يخرجوا من المسرح في لحظة دخول جورج و شادي )

جورج: إيه اللي موديهم مكتب الميس؟؟

شادي بخوف: لأ يكونوا حيقولولها علي اللي حصل مع مارك! ! بص يا عم انا مليش دعوة بيك! ! (يمشي و يتركه)

جورج:كده يا شادي؟ ؟طيب!! و بعدين لو قالوا للميس فعلا انا حأبقي في مشكلة!! لا مش حيعملوا كده...حيخافوا مني!!

(تدخل الميس المسرح و معها الأطفال)

الميس بحزم: جورج لو سمحت تعالي معايا علي مكتب الناظرة!

(يمشي جورج معها و يقف الأطفال يتحدثوا ثم تأتي اليهم المدرسة )

الميس : أنا مبسوطة منكم يا أولاد أنكم بلغتوني باللي حصل لأنه اللي كان بيعمله جورج ده كان لازم يقف لأنه بيأذي زمايله.

هو أخد إنذار و لو التصرفات دي اتكررت حيسيب المدرسة.

لازم تعرفوا يا أولاد انه التنمر ده حاجة وحشة اوي كلنا محتاجين نقف ضدها. ياللا علي فصلكم دلوقتي. (تذهب المدرسة و يأتي مارك )

مارك: ازيكم..عاملين ايه؟؟

فادي: انت فين يا عم ؟؟ عندنا حكاوي كتيييير عايزين نحكيهالك.

ايفا: طيب ياللا نروح علي الفصل الأول و بعدين نحكي..بدل ما نحكي و احنا متذنبين ها ها ها

(يضحك الأطفال مع بعض ويتركوا المسرح و تغلق الستار )

 

 

             سالي أنيس  

 
© www.madareselahad.org

مرفقات للتحميل