الرئيسية » اعدادي

اسكتش : واحد من العيلة

453

المشهد الأول:

ملحوظة : جميع الكلمات المكتوبة بين قوسين هي كلمات بالانجليزية.. مستر جوني يتحدث ويقول (أي حاجة) كأنه يتحدث الايطالية لكنه في وسط الكلام يقول كلمات تشبه اللغة العربية

يستيقظ (روماريو) الممثل من النوم.. يمسك بالمنديل كوب الشاي ثم يبدا في تشغيل موسيقى فرنسية وهو يسوي أظافره بالمبرد

روماريو: اوف مش ممكن ضوافري بقيت بتوجعني اوي .. اي.. ليه يا ربي مخلتش ضوافري حلوة ..هو الزفت اللي اسمه رضا ده اتأخر ليه .. مش ممكن الناس في مصر مش بتحترم مواعيدها خالص.. الناس مش مقدرة اهمية الوقت بالنسبة لممثل زي.

يدخل رضا

رضا: سا الخييير .. يا اهل البيت، يا جدعان حد هنا ، يا (روماريوز) بيه ، يا ناس ياللي هنا.. (اني بوديز هير)

روماريوز: بس بس ايه التلوث اللي انا بسمعه ده .. اسكت خالص، ايه الانجلش الياكي ده .. وبعدين ايه (روماريوز) و(بوديز) دول! انت ليه بتخلص كل  الجمل ب(اس)

رضا: هو (الانجليزيز) كده يا (روماريوز) بيه .. بينتهي باس دايما.. شكلك ما اخدتش درس ال(بلوراز) وانت صغير

روماريو: وداني هتبوظ منك لله .. رضا سيبك من حوار الانجلش ده وركز معايا .. عملت ايه في حوار المنتج  الايطالي

رضا: منتج ايه؟

روماريو: (اوه ماي جاد)

رضا: اسمها (اوه ماي جادز)

روماريو: وات!

رضا: ايه؟؟

روماريو: ايه اللي انت لسه قايله ده؟

رضا: (او ماي جادز)

روماريو: يعني ايه؟

رضا: يعني يا الهي

روماريو: لا .. (او ماي جادز) يعني يا الهتي .. يعني انت كده بتكفر وبتهرطق .. انت كافر صح.. قول قول (ايتي اوك) انا بتقبل كل الاديان

رضا: هار اسود انت هتلبسني مصيبة ولا ايه .. انا مسيحي وموحد يا عم في ايه؟

روماريو: لا كافر .. صدقني انا ده انجلش كفار .. ممكن بقى تنسي جو حصة ابلة مروة مدرسة الانجليزي وتكلمني عربي!

رضا: اوكيز

روماريو:عملت ايه في حوار المنتج الايطالي؟

رضا: منتج مين؟

روماريو: المنتج اللي انت كنت قايل انه جاي مصر يعمل فيلم عالمي .. حتى ساعتها وعدتني انك هترشحني امثل في الفيلم الجديد!

رضا: اه اه افتكرت .. يا باشا عيب عليك .. انا رشحتك للفيلم ده ، والمنتج الامريكي وافق ، بس اشترط انه لازم يقابلك الاول ، لان زي ما انت عارف ده فيلم ميزانيته مليار جنيه .. اضخم فيلم في تاريخ الشرق الاوسطز كله ..  عشان كده هو هيجيلك البيت بعد خمس دقايق يقابلك وعلي اساس المقابلة ديه هيحدد هتبقى انت بطل الفيلم ولا حد تاني

روماريو: (يمسك رضا من قفاه) يعني الراجل جاي بعد خمس دقايق هنا يقابلني .. والمقابلة ديه اللي هتحدد انا هبقي بطل اكبر فيلم في تاريخ الشرق الاوسط كله ، وسعادتك نسيت تقولي

رضا: معلش بقي اصل (الميموريز) عندي بعافية شوية

روماريو: الهي (ميموريز) تلهفك يا بعيد.. ايه الغباء ده

يدخل مستر جوني والمترجم بتاعه

جوني: ...

المترجم: صباح الخير .. هذا مستر جوني منتج فيلم (اغبى الاغبياء) .. من منكم مستر روماريو

روماريو: ايوة انا

المترجم: اهلا بك مستر روماريو .. مستر جوني يرحب بك وهو سعيد جدا بلقائك

رضا: ثانية واحدة .. هو انت بتتكلم بالنيابة عنه ليه؟

المترجم: مستر جوني للاسف لا يتحدث العربية ، لذلك انا اترجم له

جوني:..

المترجم: يقول لكم هو سعيد للغاية ويريد ان يسأل مستر روماريو بعض الاسئلة

روماريو: اه طبعا طبعا

جوني: ...

المترجم: احكي لنا اكثر عن طفولتك مستر روماريو .. كيف كانت حياتك الاسرية وانت صغير

رضا: اه طبعا طبعا.. انا هحكليكم

روماريو: انت مالك انت .. ايه الرخامة ديه .. ده انت تلم ورزل .. (للمترجم) انت بترجم ايه؟

المترجم: سيدي انا اترجم كل كلمة تقولها هذه هي وظيفتي

جوني: ....

المترجم: يقول لك انه بيموت في الشتيمة .. اكمل ارجوك

روماريو: ايه المنتج القليل الادب ده .. بس يا حبيبي انت بترجم ايه هتويدنا في داهية .. طيب ما علينا .. انا يا سيدي اتولدت في عيلة غنية جدا .. بابا كان مليونير وماما سيدة مجتمع ، ومعنديش اخوات .. بابا وماما كانوا دايما بيبقوا في الشغل وعمرهم ما كانوا بيلاقوا وقت لي .. عشان كده قضيت طفوتلي كلها لوحدي

جوني: (اوه حراموزو)

المترجم: يا حرام

روماريو: الافلام بقيت هي كل حياتي .. بقيت خبير في الافلام من وانا صغير .. ولما كبرت اشتغلت على نفسي لحد ما بقيت نجم كبير وانجح ممثل في مصر

جوني: .. (لا اعجابيوز) 

المترجم: انه يعبر لك عن حبه وتقديره واعجابه الشديد بقصة نجاحك سيد روماريو

رضا: الهي ربنا يستر عرضه

جوني : ...

المترجم: يقول لك انه يعتقد انك من افضل الممثلين في العالم وانك افضل شخص يمكنه ان يقوم بهذا الدور

جوني: (لكنستو)

رضا: وبعدين بقى في لغة الجبنة النستو ديه

امترجم: لكن

جوني: ...

المترجم: يعتقد انك لديك مشكلة كبيرة وهي انك لم تعش ابدا وسط عائلة ولذلك انت لا تعرف معنى العائلة

جوني: ...

المترجم: البطل هو شخصية يحب عائلته بشدة ومرتبط بها وانت لست كذلك

جوني: ...

المترجم: لذلك انت لست الشخص المناسب لهذا الدور

روماريو: لا لا ثواني .. قوله اني مستعد اني اخد كورسات واتعلم كويس معنى العيلة .. انا من الناس اللي بتذاكر ادوارها كويس اوي .. صدقني انا اقدر اتعلم ابقى بقدر العيلة في خلال وقت قليل اوي

جوني: (اوكيزو) ...

المترجم: تمام .. هو مستعد ان يعطيك فرصة .. سيعطيك مهلة لمدة شهر واحد .. بعد هذا الشهر سيقابلك مرة اخرى ويرى اذا ما كنت ادركت معنى العيلة ام لا

روماريو:  وانا موافق

جوني: (بايو).. (عافيستو)

المترجم: مع السلامة ، يعطيك الله العافية

يخرج جوني والمترجم

رضا: وبعدين يا نجم .. ده بيقولك قدامك شهر واحد .. يعني (ون مانز) هتلحق ازاي

روماريو: عيب عليك .. عادي الفلوس بتشتري كل حاجة .. تقدر تتعلم اي حاجة بالفلوس

رضا: ازاي مش فاهم .. معنى العيلة ده حاجة الواحد بيتعلمها في سنين .. وبعدين ازاي هتشتريه مش فاهم

روماريو: ملكش دعوة انت بقى .. انا هتصرف .. هبهرك.

 

المشهد  الثاني

يدخل كل من الأب والأم

الاب:  منال انا مش عارف ابلغ الولاد ازاي الخبر ده

الام: انا كده طول عمري بختي مايل .. اتجوزت واحد فاشل ومقشفر ومحلتوش اللضا وفي الاخر اه اديه بيفلس .. انا عارفة نفسي طول عمري فقرية

الاب: ميرسي جدا على ذوقك.. حقيقي انتي مثال للزوجة المصرية الاصيلة

يدخل مايكل

مايكل: صباح الخير يا بابا .. صباح الخير يا ماما

الام: خير .. هيجي منين الخير .. قول صباح الزفت صباح الاطران كده

مايكل: صباح الزفت والاطران يا ماما.. عندي ليكم خبر حلو .. حزروا فزروا

الام: انجز يا مايكل وقول

ممايكل : انا طلعت الاول ع الفصل

الاب: اوك اوك

الام: اعملك شاي يا منير

مايكل: ايه ده مفيش ادنى اهتمام بكلامي

الام: عادي ما ده الطبيعي يا مايكل طول عمرك بتطلع الاول يا حبيبي

تدخل مريم

مريم: صباحكو عنب .. صباح الفل يا اخويا يا فرفور .. صباح الخير يا ماما يا نكدية

الاب:  بس يا مريم .. مش ناقصاكي ع الصبح

مريم: ليه بس ايه اللي حصل يا شبح العيلة

الاب: يا ولاد انا عايز اقولكم خبر مش حلو .. للاسف يعني

مريم: متقولش هتطلقوا

الاب: اولاد ربنا مش بيطلقوا يا مريم

مريم: يا راجل احلف

الام: اولاد ربنا مش بيحلفوا يا مريم

مريم: لا انا كده هشتم

كله: اولاد ربنا مش بيشتموا يا مريم

مريم:طيب انا ألحد أسهل

الاب: المهم .. الخبر الوحش هو اننا فلسنا

مايكل: ايه ده بجد يا نهار ابيض

مريم : متنشف ياض مالك فرفرت كده ليه .. انشف كده .. كمل يا برنس

الاب: بس فاحنا حاليا معناش ولا مليم .. وعشان كده انا قررت 

مريم: بس متقلش هتتجوز واحدة غنية على ماما

الام :بنت عيب .. مفيش في المسيحية تعدد زوجات

مريم: بس ديه مشكلتك يعني لو فيه عادي!

الاب: ممكن متقطعنيش وتسمعي للاخر .. من كام يوم قريت اعلان في الجورنال .. ممثل مشهور اوي اللي هو اسمه روماريو ده، عامل اعلان بيقول فيه انه مستعد يدفع لعيلة معينة 100 الف جنيه مقابل ان العيلة ده تستضيفه لمدة شهر ، بشرط ان العيلة ديه تعلمه معنى العيلة وتعتبره واحد منهم خلال الشهر ده

مايكل: ثانية واحدة افهم من كده اننا هنستضيف الممثل ده هنا

مريم: ده ممثل رخم ودمه يلطش .. فرفور اويي .. يع

الاب: الراجل جاي انهارده عشان تعرفوا .. زمانه على وصول .. عايزكم ترحبوا بيه كويس اوي .. وافتكروا احنا محتاجين فلوسه زي ما هو محتاجنا بالظبط

يدخل روماريو

روماريو: صباح  الخير

الام: اهلا

مايكل: هاي

مريم: صباح القشطة يا برنس .. انت بقى حساس الجيل ، زوما العاشق

الاب: مريم.. خلي بالك من كلامك

روماريو: اهلا بيكم

الاب: ده مايكل ابني الصغير .. وديه مريم بنتي الكبيرة .. وديه مراتي منال .. استاذ روماريو اللي حكيتليكم عنه .. استاذ روماريو هيقعد معانا هنا

الام: مايكل .. استاذ روماريو هيبات معاك في اوضتك ، ممكن تفرجه الاوضة

مايكل: حاضر

يخرج الاثنين

الاب: مريم .. حاولي تتعاملي معاه كويس .. مفهوم

مريم: مفهوم ، حاضر

 

المشهد الثالث:

يدخل مايكل ومريم وساندي

مريم: مالك ياض يا مايكل متنح كده ليه

مايكل: ايه ..مفيش

مريم: ولا يا مايكل انت معجب بالبنت ساندي اللي معايا في الدرس؟

مايكل:  ايه لا طبعاً.. انا بس نفسي انها تبصلي بصة .. تعبرني .. تشوفني .. تحس بي

مريم: ماتنشف ياض شوية.. في ايه! وبعدين مالك ملهوف كده ليه، هي عادية اصلا

مايكل: ممكن في عينيكي انتي .. انما في عيني انا هي ملكة جمال مصر والشرق الاوسط .. ملاك نازل من السما

مريم: اه طب بص بقى يا عم القلة انت .. البنات يا حبيبي مبيحبوش الواد الملزق زيك كده.. وبالمنظر ده هي ولا هتعبرك ولا هترضي تبصلك حتى

مايكل: فعلاً .. طب والحل اعمل ايه؟

مريم: اول حاجة تنشف .. تاني اعدل لبسك ده شوية .. روح كلمها كده زي الراجل

مايكل: ما انا مش عارف اكلمها في ايه .. تفتكري اقولها شعر ولا اجيبلها شوكولاته هدية

تضربه

مايكل: اهههه.. ايه العنف ده

مريم: شكولاته ايه يا اهبل انت .. احنا لاقيين ناكل .. وبعدين خدها قاعدة مفيش بنت في الدنيا تستحق انك تدفعلها فلوس الا مراتك في المستقبل .. اسألني انا احنا بناكل على قفاكم عيش با برنس

مايكل: ايوة يعني اعمل ايه برده؟

مريم: انا اقلك .. هي شكلها واقفة مستنية اتوبيس او مواصلة .. اعمل نفسك خايف عليها وافتح معاها كلام .. اهم حاجة تبين انك خايف عليها وهتحميها .. يلا .. وانا هروح على الدرس بتاعي

تخرج مريم

مايكل : يا آنسة .. يا هانم

ساندي: هانم .. انت مين؟

مايكل: اعرفك بنفسي انا مايكل.. اخو مريم اللي معاكي في الدرس.. والأول على دفعتي خمس سنين ورا بعض.. سني 13 سنة وشهرين.. هوايتي عزف الكمانجة..عازب وغير مرتبط .. واسعى للتعارف الجاد

ساندي: ايوة يعني عايز مني ايه برده

مايكل: مفيش انا لقيتك واقفة وحيدة عرضة للمضايقات من اللي رايح واللي جاي فحسيت انك في ورطة .. وانتي فاهماني بقى

ساندي: مالك يا بابا!

مايكل: فانا بقى لقيت ان من واجبي كراجل شهم ونبيل اني اقف معاكي احميكي من مضايقات الشباب الصيع المنحل

ساندي: لا شكرا مش محتاجة حمايتك يا قطقوط

مايكل: لا ازاي انا لا يمكن اسيبك

ساندي: اه .. طب امشي من هنا بدل ما ألم عليك الناس

مايكل: ايه ده لا انتي فهمتيني غلط .. انا مش قصدي .. الله يخرب بيت شورتك المهببة يا مريم

يدخل نادر

نادر: انت بتعمل ايه يا حبيبي

مايكل: انت مين ؟

نادر: وانت مالك ! انت بتضايقها ليه

مايكل: لا انا جاي احميها من امثالك

نادر: امثالي! بيضايقك ده يا ساندي؟

مايكل: انت كمان سألت على اسمها

ساندي: ايوة يا نادر بيضايقني

مايكل: ايه ده انتو تعرفوا بعض

نادر: شوفت بقى .. ده انت ليلتك سودا .. يلا ياض من هنا .. يلا

مايكل: من فضلك .. انا مسمحلكش تهيني كده قدامها

ساندي: انا مش فاهمة ايه اللزقة ديه .. انت مبتحسش يا ابني.. انت فاكر انك هتعجبني مثلا .. ايه القرف ده .. انا عمري ما ابص لواحد زيك .. اعرف مقامك بقى .. عيل رخم صحيح

مايكل: ...

نادر: اديك سمعتها اهو بنفسك .. اتفضل امشي بقي قبل ما تضرب

مايكل: حاضر

يخرج مايكل

ساندي: اوف ايه الواد ده

نادر: اي خدمة

ساندي: انت اتأخرت ليه .. ده انا بقالي كتير اوي مستنياك

نادر: نعم مش فاهم

ساندي: يعني انا كان نفسي ندخل الدرس سوا

نادر: ليه انتي مش عاملة الواجب ولا ايه

ساندي: لا بس يعني بنبسط لما بشوفك ونتكلم مع بعض شوية

نادر: اه اوك .. وانا اللي فاكرك جاية عايزة مصلحة

ساندي: لا لا مصلحة ايه .. انا مش بافكر بالطريقة ديه خالص.. هو يعني لو اتكلمت معاك ابقى عايزة منك حاجة

نادر: لا مش لازم .. طبعا

ساندي: طيب ممكن اسألك سؤال .. هو انا ينفع انقل منك واجب الحصة اللي فاتت

نادر: مفيش فايدة

تدخل رنا

رنا: كويس اني لحقتكم

ساندي: ليه في ايه

رنا: مفيش حابه ندخل نقعد جنب بعض .. اصلي مش مذاكرة حاجة وخايفة اقعد لوحدي الميس تصطادني وتسألني .. وانا مييح

نادر: لا متقلقيش احنا هنلحقك.. هي ميس رخمة اصلا

رنا: انا اللي غايظني مش الميس .. انما البنت اللي اسمها مريم ديه .. يا على الغلاسة

ساندي: ايوة عندك حق ديه بنت غلسة ورخمة .. مسترجلة اوي بجد

نادر: ايوة عارفها .. ديه بنت غريبة .. ديه بتلبس التشيرتات بتاعت الولاد اصلا!

رنا: لا واكتر حاجة بتنرفزني منها طريقتها مع المدرسين .. دايما مذاكرة وعاملة الواجب .. وعارفة كل الاسئلة .. وطبعا المدرسين بيحبوها هي بس .. بالذات ميس منى .

ساندي: ايوة لان ميس منى زيها بالظبط .. نكدية اوي .. وبتكره البنات الحلوين .. عايزة كل البنات تبقى مسترجلة زي مريم

نادر:طب يلا عشان نلحق الدرس

يخرجوا .. ننتظر قليلا ثم يدخلون هم الثلاثة مرة اخرى

رنا: اوف درس متعب اوي

ساندي: انا صدعت

رنا: ومريم ديه .. جاية بعد ما الدرس خلص تقول للميس .. "ميس حضرتك نسيتي تدينا الواجب"

نادر: انا مش فاهم البنت ديه جايبينها منين

تدخل مريم

مريم: مساء الفل عليكم عاملين ايه

نادر: مساء العنب يا اسطى

مريم: اسطى؟!

رنا: اه اسطى.. مش عاجبك .. اومال يقولك ايه .. يا آنسة ولا ياعروسة

مريم: هو في ايه انتو بتكلموني كده ليه؟

رنا: اومال نكلمَك ازاي؟

ساندي: ايوة صح اومال نكلمَك ازاي؟

مريم: نكلمَك .. انتو شايفني ولد ولا ايه؟

رنا: اومال شايفينك بنت مثلا

نادر: بنت! انا مش شايف اي بنت غيركم

مريم: لا بجد! ده ايه الاستظراف الرخم ده

نادر: ايه ده شكلها اتضايقت .. لا حرام يا جماعة

رنا: اه خلاص .. بقولِك ايه .. هو التيشيرت ده بتاع باباكي ولا اخوكي

ساندي: لا تلاقيها شاحتاه من جدها 

نادر: صح .. ولد ولد يعني

مريم: انا غلطانة اني وقفت معاكم اصلا

تخرج مريم وهم يضحكون

نادر: استنى بس متضايقش

رنا: احسن تستاهل .. يلا بينا احنا

يخرج الجميع

 

المشهد الرابع

يدخل مايكل وصديقه سمير

سمير: شوفت ياض يا مايكل الماتش ده .. يالهوي ، الاهلي بيتغلب ياض

مايكل: اه اه شوفته

سمير: ايه ده مفرقش معاك خالص

مايكل: لا عادي

سمير: يابني انت مش زملكاوي وبقالك عشر سنين مستني الاهلي يتغلب .. مالك مش مظقطط ليه؟

مايكل: هبقى اظقطط حاضر

سمير: عيل كئيب صحيح

مايكل: بس يا سمير انا مش ناقصك

سمير: ايه الرخامة ديه .. بقولك ايه بما اني في بيتكم وكده مش هتعزم عليا بحاجة! معندكوش ورق عنب او كرنب او ملوخية بالارانب

مايكل: التلاجة عندك خد منها اللي انت عايزه

سمير: ايه ده لا .. مينفعش ، ديه قلة ذوق كده، لازم انت اللي تعزم عليا

مايكل: يا سلام وانت من امتى بيفرق معاك ، ما طول عمرك طفس

سمير: انا!! ربنا يسامحك.. طب ايه مش هتلعب بلاي ستيشن؟

مايكل: لا

سمير: نتفرج على ماتش ليفربول

مايكل: لا

سمير: طاب ندخل نرخم ع البنات ع الفيسبوك

مايكل: لا

سمير: اه طب تحب امشي

مايكل: يا ريت.. واقفل الباب وراك

سمير: احم ، واضح اني باتطرد.. طيب اسيبك انا بقى يا مايكل عشان الحق ميعادي

تدخل الام

الام: ماله سمير ، شكله خارج متضايق .. عملتله ايه؟

مايكل: مفيش

الام: انتو اتخانقتوا ؟

مايكل: لا

الام: امال في ايه

مايكل: مفيش يا ماما، ما قلت مفيش خلاص بقى ، اغنيهالك ؟!

الام: ايه ده في ايه .. ما تلكمني كويس

مايكل: انا اسف يا ماما ... ممكن بعد اذن حضرتك تسيبيني لوحدي شوية

يدخل روماريو

روماريو: ايه يا جماعة صوتكم عالي كده ليه؟

الام: البيه متضايق وبيعلي صوته على مامته

روماريو: وفيها ايه؟

الام: نعم!!!

روماريو: ايه ..قصدي لا عيب يا مايكل .. امال فين مريم

الام: باباها راح يجيبها من الدرس وزمانهم جايين

يدخل الاب ومريم

 الاب: ممكن بس تفهميني ايه اللي مضايقك

مريم: ما قلتلك مفيش بقى .. ايه القرف ده ... بابا بطل تخنقني لو سمحت

الام: بنت انت ازاي تقولي لباباكي قرف

روماريو: وبالنسبة لتخنقني عادي يعني

مريم: اوف انا بجد قرفت .. انا داخلة أوضتي

مايكل: وانا كمان

روماريو: يبدو انكم فشلتم في التربية .. طيب استأذن انا بقى

الاب: استنى هنا رايح فين

روماريو: اسيبكم تحلوا مشاكلكم العائلية

الام: يا سلام وانت مش معانا

روماريو: يعني ايه؟

الاب: هو ايه اللي يعني ايه؟ يابني انت مش قلت انك عايز تعيش وسط ناس كأنك واحد من العيلة، يبقى مفروض تساعدهم

روماريو: ايوة انا قلت كده.. وده ايه علاقته بان مايكل ومريم متضايقين.. انا هستفاد ايه لما اساعدهم

الام: اه .. واضح انك فعلا متعرفش يعني ايه عيلة ...  العيلة فكرتها انك بتحب الناس اللي فيها من غير سبب .. بتقف معاهم مش عشان هتسفاد لكن لانكم حاجة واحدة .. لأنكم بتحبوا بعض .. بتفضلوا قريبين من بعض طول حياتكم .

روماريو: ايوة بس اي حد في حياتي المفروض علاقتنا بأي حد تبقى مؤقتة .. يعني احنا كلنا فترات ف حياه بعض

الام: الا العيلة .. اخواتك ومامتك وباباك مش فترة معينة في حياتك وبعدين متعرفهمش .. دول ناس مكملين معاك في حياتك على طول .. بتفضل قريب منهم اوي وبتحبهم وانت كبير وانت صغير وفي كل وقت .. هم حد صاحبك طول العمر بيفضل كده على طول

الاب: من الاخر .. العيلة هم صحاب ليك ثابتين .. مهما حصل بينكم بتفضلوا دايما عيلة واحدة

الام: وده الفرق بينهم وبين الاصحاب .. لأن الاصحاب ممكن يجوا في وقت يبعدوا ، ميبقوش صحاب وهكذا .. انما العيلة هي صاحب قريب ليك ثابت مش بيتغير

روماريو: يعني كواحد من عيلتكم مفروض اعمل ايه دلوقت

الاب: تروح تحاول تساعد مايكل ومريم.. تقف معاهم حتى لو مش هتستفيد من الموضوع

روماريو: حاضر انا هعمل كده فعلا

 

المشهد الاخير :

يدخل كل من مايكل وروماريو وصموئيل وفادي

روماريو: صباح الخير يا مايكل .. مروحتش المدرسة ليه؟

مايكل: مليش مزاج

روماريو: لا انت مكتئب .. عشان البنت الكراش طنشتك .. قول عادي كلنا بنتعرض لهذا الموقف

صموئيل: ايه يا عم روماريو .. متقولش كلنا .. متجمعش لو سمحت

فادي: ايوة صح احنا جامدين جدا

مايكل: معلش يعني انا اسف على السؤال الرخم .. بس هم مين دول وبيعملوا ايه في أوضتي

روماريو: انا اقولك .. صموئيل ، احسن واحد بيلعب كورة في المنطقة

صموئيل: ايوة يا ابني ده انا ليفربول عمالين بيتحايلوا عليا اروحلوهم .. ده انا محمد صلاح ده حبيبي الروح بالروح

فادي: لا متظطش .. بطل تحوير

روماريو : وده كان صموئيل .. هو بيظيط بس طيب وحرييف فعلا

مايكل: والبرنس ؟؟

روماريو: ده فادي .. احسن حد يعملك تلعب كورة .. ده اللي هيدربك

مايكل: ميرسي جدا .. معلش استفسار بس .. هيدربوني على ايه؟

صموئيل: على لعب الكورة عشان تنضم لناشئين الاهلي معانا

مايكل: مش فاهم

فادي: يا ابني انا مش بتحلم تبقى لاعيب كورة

مايكل: انا!

صموئيل: ايوة انت بتحلم تبقى لعيب كورة انت ايش عرفك انت؟

روماريو: انا هفهمك .. انا عرفت انك متضايق وسألت عيلتك .. ايه اكتر حاجة انت بتحبها ، فقالولي الكورة .. وقالولي كمان انك متعرفش حد يساعدك فطنشت الحوار.. بس انا شايف انك لازم ترجع تفكر فيه تاني .. لازم تنجح في الحاجة اللي بتحبها عشان ثقتك في نفسك ترجعلك

صموئيل: عشان كده لازم ترجع تتمرن معانا من بكره .. لحد ما تبقى (فيت)

مايكل: ابقى ايه؟

صموئيل: (فيت) يعني رياضي وجامد كده

فادي: واحنا اللي هنساعدك

مايكل: انت بتعمل معايا كده ليه؟

روماريو: عشان احنا عيلة انت نسيت ولا ايه .. احنا ملناش غير بعض .. قوم يلا عشان نساعد اختك .. متشكرين يا رجالة

فادي: العفو

صموئيل: افتكر هتبقى (فيت)

يخرجوا وتدخل مريم ثم يدخل روماريو ومايكل

مريم: اطلعوا بره مش عايز اشوف حد فيكم

مايكل: طيبة اوي .. كيوت كيوت يعني

مريم: ما قلت اطلعوا بره انتو ايه مش بتفهموا

روماريو: ميرسي جدا .. ممكن بس نتكلم معاك خمس دقايق وهنمشي

مريم: لا

مايكل: طيب شكرا شكرا .. شد كرسي يلا

روماريو: بصي بقى انا هجبلك من الاخر .. انا مبقاش فارق معايا حوار الفيلم على قد ما فارق معايا اني فهمت معنى العيلة فعلا

مريم: اوك ربنا يسهلك

مايكل: لا انتي فهمتي غلط احنا مش جايين نشحت .. احنا جايين نساعدك

روماريو: احنا اتناقشنا في مشكلتك ووصلنا لحل

مايكل: انتي مشكلتك انك حاسة بالخوف من الناس . خايفة الناس تحس انك ضعيفة او اقل منهم .. فبتحاولي تصدريلهم وش الجريئة القوية .. وده تمام

روماريو: المشكلة انك باللي بتعمليه ده مش بتحلي مشكلتك الاصلية وبتفضلي حاسة انك لوحدك

مريم: وايه الحل بقى يا عم الدكتور النفساني

مايكل: الحل في العيلة

مريم: نعم؟

روماريو: الحل انك تبقي وسط ناس بيحبوكي حب غير مشروط .. يبقى ليكي اصحاب قريبين اوي منك .. تقدري تحكيلهم على اي حاجة .. تباني قدامه ضعيفة من غير ما تبقي خايفة على صورتك قدامهم

مايكل: انتي محتاجة عيلة تبقي جزء منها .

روماريو: انا يمكن مقدرش اساعدك في الحوار ده.. بس مايكل وبابا وماما يقدروا .. قربي من عيلتك يا مريم .. خليهم هم الناس اللي بيسندوكي لما تبقي لوحدك .. خليهم هم الناس اللي ثابتين في حياتك .. مش بيقولوا اننا فترات في حياة بعض.. ممكن يبقى ده حقيقي الا مع العيلة .. العيلة هم الناس الوحيدة اللي مفروض يبقوا قريبين مننا طول العمر.|


اجتماع اعدادي – جمعية خلاص النفوس شبرا

© www.madareselahad.org

 

 

  

مرفقات للتحميل