المشهد الأول : مينا وماما

ماما : مينا، مينا يا اصحى الساعة بقيت ١٢ ، يا بقى قوم مش وراك مذاكرة ولا إيه ؟؟

يلا يا مينا ما هو مش عشان يوم أجازة يبقى تنام للضهر، مينااااااااااااااا

مينا : حاضر حاضر يا ماما، أنا قمت أصلا )بيتاوب، لسه صاحى من النوم( ممممم بص بقى يارب، أنا انهارده مش هاكدب ولا كدبة واحدة، أوكى ... يارب ؟ ده وعد منى

)يرن جرس الباب(

ماما : مينا، روح شوف مين على الباب

مينا : يوه أنا لسه صاحى من النوم، إيه ده ؟!

ماما : يلا يا مينا بسرعة، مش عايزة كتر كلام على الصبح

مينا : حاضر حاضر(بخوف(

)يذهب وينظر من العين السحرية(

مينا : ماما، دى طنط فتكات إللى تحت

ماما : يوه هى الست دى مبتزهقش أبدًا ؟! كل شوية تيجى تستلف عايزة...تاخد منى فرخة ! يوووووه... مينا، روح قولها ماما مش موجودة.

مينا : بس يا ماما......

ماما : ميناااا، أنا قلت إيه ؟ مش عايزة كتر كلام على الصبح !! )بغضب(

مينا : طيب يارب دى أخر كدبة، أديك شايف مش بإيدى !

)يفتح الباب(

مينا : طنط فتكات، إزيك ؟

ماما ؟

لأ للأسف ماما مش موجودة.....

)موسيقى(

المشهد الثانى : مينا وصاحبه

مينا : ادخل ادخل ياعم ! أيوة باقولك مفيش حد فى البيت

مايكل : يعنى متأكد إن باباك ومامتك مش هايضايقوا

مينا : ياعم وهما هايعرفوا منين يعنى ؟! باقولك مش موجودييييين !

بابا فى الشغل وماما نزلت مع أختى نوسة يشتروا حاجات !

مايكل : طيب انت أدرى !

مينا : وبعدين أصلا أنا محدش فى البيت ده يقدر يكلمنى، انت عارف ؟ ده ماما عمرها ما تقدر تزعق ى خالص !

مايكل : يارااااجل ؟!! بقى فى واحد مامته متقدرش تزعقله ؟!

مينا : أيوة، زى ما باقولك كده، طيب انت عارف ؟! أنا ماما الصبح كانت عايزانى أفتح الباب، وأنا كنت لسه صاحى من النوم، رحت زعقت فى ماما وقلتلها: ايه هو ده ؟ مش شايفانى لسه صاحى من النوم ؟!وقولتيلها انى مش هاعمل أى حاجة قبل ما تحضرلى الفطار !

مايكل : إيه ده ؟!! ده انت جامد قوى ! ياريتنى كنت أقدر أعمل زيك !ده أنا بابا وماما كل شوية يطلبوا منى حاجة وأضطر أعملها، مش بالحق أرتاح خااااالص !

مينا : يا ابنى، وانت فاكر انك ممكن تبقى زيى ؟ دى شخصيااات

مايكل : طيب ايه ياعم ؟ هاتقضيها كلام كده ؟ ولا هاتدخل تجيبلنا ماكينة الفيشار بتاعتكو من جوه، زمان كيمو والشلة قاعدين مستنينا كل ده ؟

مينا : لأ أنا داخل أهو

)موسيقى(

مينا: (بيكلم ربنا) يوه يارب ! عارف انت عايز تقول إيه ! بس يرضيك يعنى أطلع عيل قدام أصحابى ! لأ ما أنا لازم أظهر إنى جامد كده !

مايكل : يلا يا مينا، هانتأخر !

مينا : حالاً أهو ..... )بيدو على الماكينة( ماكينة الفيشار.... ماكينة الفيشار ... أيوة ! أهييى !

)يذهب لمايكل(

مينا : أهى، امسكها انت على ما أقفل الباب

مايكل : ماشى، انجز ياعم، اتأخرنا على الناس !

)ينزل مايكل وهو مستعجل، تقع العلبة من يده(

مينا : يالهوى!!! إيه اللى انت عملته ده ؟!! هاقول إيه لماما دلوقتى ؟!!

)مرعووووب(

مايكل : أنا اسف يا مينا بجد، بس ثانية ! انت مش قلت انك مش بيهمك من مامتك ؟!

مينا : باقولك إيه يا مايكل ؟! أنا مش فايقلك دلوقتى ! امشى إنت وأنا هاشوف هاعمل إيه فى المصيبة دى !

)يدخل جوة(

مينا : أنا أحسن حاجة أخبيها، وماما أصلا مش بتستخدمها كثير، ده احنا ممكن منعملش فيشار لغاية السنة الجاية !

المشهد الثالث : مينا والانكار

)تدخل ماما ونوسة أخت مينا(

نوسة : ميرسى يا ماما على الحاجات اللى جبتيهالى

ماما : العفو يا نوسة، مينا، مش تقول لأختك مبروك ؟ دى طلعت الأولى على الفصل الشهر ده !

مينا : مبروك يا نوسة !

نوسة : الله يبارك فيك ! وماما جابتلى DVD جدييييد !

مينا : يا سلااااام كمان !

نوسة : يلا بقى نتفرج عليه، ده شكله جامد قوى ! أنا هاشغله

ماما : طيب اقعدوا اتفرجوا وأنا عاملة لكم مفاجأة !

مينا : (قلقان جدًا( ربنا يستر.... ربنا يستر  (بيكلم نفسه(

)صوت الفيلم شغال(

)ترجع ماما(

ماما : ياولاد، محدش شاف ماكينة الفشار، أنا مش لاقياها فى مكانها !

نوسة : لأ يا ماما

مينا : لأ يا ماما، ده أنا حتى مش فاكر شكلها كان إيه

)موسيقى(

مينا : ما هو أصل انت يارب مش عارف ماما هاتعمل فى إيه لو عرفت !بس بجد دى آآآآآآآخر مرة

)تخرج ماما بالعلبة(

ماما : )بغضب( ممكن أعرف مين إللى عمل كده ؟

)محدش بيرد(

ماما : انت يا مينا ؟

مينا : لأ مش أنا دى أكييييد نوسة !

)موسيقى(

)ماما ونوسة ينظران للخلف كأن مينا لوحده(

مينا : يارب ! ساعدنى ! أنا مش عارف أعمل إيه !!

الراوى : أيه رأيكم يا أولاد فى اللى عمله مينا ؟

طب لو كنت مكانه كنت هاتعمل ايه ؟!

© www.madareselahad.org