الرئيسية » اعدادي

اسكتش : المرفوضون

892

 

الشخصيات 

مريام – سمر – شادي – رانيا – ديفيد – فادي - ميرنا

المشهد الاول :

يدخل سمر و شادي و ديفيد و ميرنا

شادي : تعالوا بصوا رانيا بعتتلي ايه امبارح .. لا لا لازم تشوفوا ، مسخرة بجد

سمر: وريني كده ..( تقرأ الرسالة علي الموبايل ) صباح الخير يا شادي ، هل من الممكن إذا "تكر مات " ، ايه ده يعني ايه تكر مات ديه

ميرنا: وريني .. "تكرمت" يعني بليز .

شادي: لا احنا مش هينفع نكمل كده .. ديفيد تعالي اقرالنا الالغاز ديه

ديفيد : من عينيا .. (يقرا من الموبايل) ، صباح الخير يا شادي هل من الممكن إذا تكرمت توافق علي الاشتراك معي في مشروع نهاية العام .. و تفضل بقبول فائق الاحترام.

ميرنا: انت متاكد ان ديه رسالة هي بعتتها امبارح مش جواب من جدك جاي بالغلط .

شادي: اه متاكد .. تفتكروا ارد عليها اقول ايه

سمر: انا رأيي تاخد رأي جوجل ترانسليت في الموضوع ده

ديفيد: بس انا هقولك .. اكتب ورايا .. "عزيزتي رانيا.. لقد وصلتني رسالتك الهبلة بالامس  و انا اتأمل اللون الزهري الذي يغطي حوائط غرفتي و قد قررت الاتي بخصوص طلبك السخيف .. اكملي مشروعك السخيف  المتفكس بعيدا عني ."

شادي: بس اتبعتت .. ايه ده بصوا البروفايل بيكتشر بتاعتها .. متصورة مع ولد و كاتباله " حبيبي و سندي و ضهري في الحياة ، يا من لا اجد معني للحياة بدونه .. يا من جمعني به رحم واحد .. سمايل سمايل ، احبك كثيرا"

ميرنا: ايه ده .. معقولة .. هي اينعم الكلام تحسوا هربان من كتاب العربي .. بس مش غريبة

سمر: بصي هو الولد لايق عليها.. بس هو الرخم اللي جمعهم .. هم كان في بينهم (ميوتال فريند) رخم

ديفيد: رحم .. يعني اخوها يا جدعان ، اخووووها .

سمر: و ايه اللي هي لابساه ده ، الستارة .

ميرنا: مش عارفة .. لازم اشوفه عشان اعرف

تدخل رانيا

راينا: صباح الخير

سمر: بس اهي جت .. و لابسة نفس الستارة

شادي: تقريبا معندهاش غيرها

ميرنا: فظيع فظيع يجنن .. رانيا ممكن اسالك سؤال مهم اوي

رانيا: اه طبعا اتفضلي

ميرنا: هي ديه ستارة الحمام و لا المطبخ

ديفيد: بنت عيب .. مش بنتريق علي زمايلنا .. ديه اكيد ستارة غرفة قراءة كتب الفن السريالي في غرفتها

شادي (لديفيد) : ديفيد .. هو ايه فن سروالك ده ؟

ديفيد: ششششش ، بس يا بابا

رانيا: طيب متشكرين اوي .. بما ان شادي مش راضي يبقي معايا في المشروع بتاع السنة ديه .. ممكن حد منكم يساعدني ، بجد مش هعرف اعمله لوحدي .

صمت

رانيا: ممكن؟

ديفيد: صوت صرصور الحقل

سمر: لا لا حرام انا هساعدها .. وريني كده يا رانيا انتي كتبتي ايه ورا المستر و ناوية تعملي ايه في المشروع

رانيا : اه طبعا .. بصي افتحي الشنطة و خدي الكراسة الزرقاء مش الصفراء

سمر تاخد الكراسة الصفراء

سمر: اما نشوف .. ايه ده مذكرات (موسيقي)

رانيا : انتي بتعملي ايه .. هاتيها

ترمي الكراسة لشادي

شادي: اليوم التقيت بشادي .. لازال لا يبدي لي اي درة

ديفيد: درة ايه .. هات يا شادي .. امسكوا البنت ديه.. لا يزال لا يلقي اي ذرة من الاهتمام .. يبدو انه لن يوافق علي ان يشترك معي بالمشروع .. اشعر احيانا انه اسير يسير

شادي: ايه ده انا آسر ياسين .. مرسي جدا

ديفيد :  اسير يسير بلا هدي

شادي: من غير هدي ازاي يعني .. هدي مين ؟

ديفيد: يعني من الاخر هي شايفاك تايه و فصيل يا معلم

شادي:  لااااا ، سيبوهالي .. انا آسر ياسين من غير هدي .. طيب انا هوريكي .. ولا يا ديفيد صور البتاعة ديه

ميرنا : اه اه و نزلها علي (فريندشيب).. ديه هتبقي تريند .. ده احنا ممكن ناخد بيها مليون فيوير .

رانيا: لا .. لو سمحتوا ديه حاجة خاصة .. مش من حقكم تعملوا كده

شادي : مش انا مش عارف اسير بيطير و لا بيسير .. انا هوريكي

يصور ديفيد الكراسة و يلقي الكراسة ثم يخرجون .

رانيا: واضح اني مش... مفيش فايدة .. هفضل طول عمري كده ، لوحدي.. كله بيتريق عليا .. طبعا و لا عندي فلوسهم ولا علاقتهم .. و لا عندي فريندز كتير علي فريندشيب.. ولا باخد خصومات علي اللبس و المحلات الغالية .. لازم يكرهوني ، هم عندهم حق ، انا متحبش .. انا مش قادرة احب نفسي .. بيتهيألي انا اقل واحدة عندها اصحاب في الستة مليار مشترك في فريندشيب .. انا مش طالبة كتير ، مش عايزة غير كام حد يحبني ، غير فادي اخويا .. بس واضح ان ده دلوقت في الزمن ده بقي صعب .. صعب اوي.

المشهد الثاني:

تدخل سمر و شادي

سمر: ها طمني عملت ايه في حوار المشروع

شادي: بصي يا ستي .. احنا عملنا البرومو خلاص ، المشروع فكرته هتبقي تصميم لمكان لعب للناس اللي عدوا 2000 فريند علي فريندشيب .. الناس ديه هيبقي ليها امتيازات كتير اوي هناك.

سمر: هايل .. و انا زي ما قلتلك عملت هاك لاكونت المستر علي فريندشيب و عرفت هو هيحط الدرجات على اساس ايه بالظبط  .. كده مش فاضل غير الدعاية للمشروع

شادي: اطمني انا اتفقت مع ديفيد انه يظبطلنا حكاية شركات التخفيضات و اتفقت مع ميرنا هتظبطلنا الدعاية وسط الناس اللي قدنا

سمر: كده الاربع حاجات المطلوبين مننا في المشروع اتعملوا .. فكرة جديدة، فيها المواصفات اللي المستر عايزها ، دعايا للشركات ، دعايا للناس اللي في سننا

شادي: و زي ما اتفقنا المشروع هتبقي انتي مديرته  .. و احنا التلاتة مساعدين .. يعني انتي هتاخدي اكتر درجات في المادة ديه

سمر:تفتكر هناخد اول

شادي:بصي احنا اكيد هناخد اول على الفصل لان مفيش مشروع غيرنا غير بتاع رانيا .. ده لو عرفت تعمله لوحدها اصلا .. انما اننا ناخد اول على المدرسة فديه مش مضمونة اوي .. هو الموضوع بيعتمد زي ما انتي عارفة علي كمية الناس اللي هتشوف المشروع و تشيره و تصوتله .. يعني من الاخر علي عدد الفريندز اللي عندنا علي فريندشيب و الشركات اللي هتبقي معانا .. متقلقيش احنا معاكي.

سمر: شكرا

شادي: لا انا مش عايزك تشكريني .. انا عايز الشير من صحابك علي فيديوهاتي علي فريندشيبتيوب زي ما وعدتيني

سمر: حاضر يا سيدي.. مادي اوي

شادي: مادي مادي .. باقولك ايه انا لو عديت ال3000 فولوير علي الصفحة هاخد من فريندشيب خصم 50% علي ايفون .. ده مش هزار.

تدخل مريام

مريام: مسا الخير عليكم(بالتركي) .. سمر موجودة

شادي: اه اه انا سمر

مريام: سوري(بالتركي) .. بس انا المعلومات اللي عندي بتقول ان سمر ديه كيز (فتاة)

شادي: كيس .. كيس ازاي يعني

مريام: كيز.. يعني بنت بالتركية

سمر: هو انتي ليه محسساني اننا كنا في مدرسة اسطنبول التجريبية للغات .. و بعدين مين حضرتك؟

مريام: باردون نسيت اعرفكم بنفسي .. انا مريام اوغلو المديرة التنفيذية لشركة فريندشيب بالشرق الاوسط و حاصلة علي دكتوراه من جامعة اوكسفورد في علوم الاتصال و بدرس حاليا في الجامعة الامريكية بالقاهرة .. انا تركية و من اصول لبنانية لكني اقيم الان بمصر

شادي: ايه اصول لبنانية !

سمر: يا سلام!! يعني انت مفرقش معاك كل اللي هي اشتغلته ده .. و فارق معاك من اصول لبنانية

شادي يتنح

مريام: خير هو شو فيه؟

سمر: لا متقلقيش ديه حالة عندنا اسمها تتنيحاشن .. ثواني هافوّقه .. شاادي فوووق يا بابا

شادي: اوف ايه الفصلان ده .. ايه انا معجب اوي بيكي ..ايه بحضرتك .. ايه بشركة حضرتك

مريام : اه ، طاب (اذهب بعيدا بالتركي)

شادي: يعني ايه؟

مريام: يعني اغرب عن وجهي

شادي: يعني ايه برده

مريام: يعني بالمصري .. العب بعيد يا شاطر.

شادي: سانك يو اند جود باي .

يخرج شادي

سمر: مفيش فايدة .. خير حضرتك كنتي عايزاني

مريام: الحقيقة هو مش خير خالص .. شركتنا رصدت الهاك اللي انتي عملتيه لاكونت المستر بتاعك ، و طبقا لقوانين بلدك فعقوبة ده السجن و دفع غرامة مالية قدرها 100,00 جنيه .. ده غير إنك هيبقي ممنوع تعملي أي اكونت علي فريندشيب لمدة 10 سنوات ..اه وكمان كل رسايلك و اسرارك راح نذيعها لتكوني عبرة للباقي.. و كل الخصومات اللي اخدتيها هتتسحب منك .. من الآخر كده استاذة سمر انا جاية ابلغك اننا راح كيف ما بتقوله بالمصري "ننفخك".

سمر: ايه .. لا لا انتي ، أكيد بتهزري.. صدقيني انا معملتش هاك لحد .. انا اصلا امبارح الساعة 8 كنت مع شادي و ميرنا حتي اساليهم .. ازاي هعمل هاك و انا مع اصحابي . و حياة و رحمة ...

تقاطعها.

مريام: استاذة سمر هادي حركات مصريين احنا عارفينها كويس.. و بعدين انتي كيف عرفتي ان الهاك اتعمل الساعة 8 بالأمس

سمر: ايه! توقعت.. اصل حد بيعمل هاك علي امتحان الشهر اللي المستر بيحطه علي الساعة 6 ، معندوش غير تقريبا الساعة 8

مريام: و انتي عرفتي منين انه عمل هاك على امتحان الشهر بتاعكم انتو بالذات

سمر: ايه! توقعت ، ما هو اصل .. ده الامتحان اللي هو عامل له باسورد و حطه في فايل....(تدرك غباء ما تقول).. اوف انتي صح انا غبية اوي بجد .. بس بليز بليز ممكن تسامحوني المرة ديه.. انا ممكن اعملكم اي حاجة انتوا عايزنها

مريام: و عشان هيك انا جتلك .. احنا عندنا ليكي مهمة .. لو عملتيها هنعفوا عنك.

سمر: و ما هي تلك المهمة اللعينة؟

مريام: شوفي احنا هنقول انك سافرتي مهمة لتركيا في مهمة تبعنا .. و بكده مش هتعملي المشروع السنة ديه.. و في الفترة اللي جاية محدش هيبقي بيشوفك غير شخص واحد بس .. الشخص ده هو اكتر شخص (ريجيكتيد) في المدرسة .. مهمتك انك تساعدي الشخص يبقي عنده اكتر فريندز علي فريندشيب ، و ان مشروعه ياخد اول على المدرسة كلها .

سمر: و مين هو الشخص (الريجيكتيد) ده؟

مريام: رانيا

سمر: لا وديني السجن .. انا استهال اروح هناك.. انا مش بس حرامية ، انا كمان كدبت عليك .. و معرفتش اكدب عليكي كمان .. يعني متآمر و اهبل.

مريام: لا تخافي.. احنا راح نساعدك .. كل (الداتا بيذ) بتاعتنا تحت امرك.. بدل اساليب الهاك المتخلفة بتاعتكم

سمر: حتي الهاك مش متقدمين فيه!

مريام: باختصار انتي معاكي صلاحية لمعرفة او تغيير رسايل اي شخص .. الحاجة اللي ممنوع تعمليها هي انك تغيري عدد الفريندز عند اي شخص .. ها قلتي ايه

سمر: ايه ده الله! يعني انا هقدر اشوف رسايل كل اصحابي .. قشطة انا معاكم

مريام: تمام.. قدامك عشرة ايام بس .. الحقي قابلي رانيا و ساعديها.. و انا في مقر الشركة لو احتاجتي اي شئ.

المشهد الثالث:

تدخل رانيا و فادي

فادي:ايه الاخبار .. عملتي ايه ؟ حد رضي يساعدك في المشروع؟

رانيا: لا كلهم رفضوا .. و قعدوا يحفلوا عليا كمان .. و هيكملوا الحفلة علي فريندشيب انهارده

فادي: برضه .. نفس اللي حصل معايا في المدرسة انهارده .. باقولك ايه احنا لازم نقفل البتاع ده .. كفاية كده

رانيا:   صح عندك حق .. حتي لو هاننقص شوية في الدرجات و هيقولوا عليا متخلفة.. بس كفاية بقي .. زمان كان الفيسبوك الناس بتحكم علينا من عدد اللايكات .. دلوقت الفريندشيب بقي الناس بتحكم علي نجاحنا و حياتنا كلها من عدد الفريندز .. حتي اللبس و الخروجات بقيت معتمدة علي عدد الفريندز علي البرنامج .. مش فاضل غير ان اكلنا و شربنا يبقوا مرتبطين بالبرامج ديه .. و يبقي عدد الفريندز علي برنامج بيتحكموا هتعيش ولا هتموت.

فادي: و انا ممكن اساعدك في المشروع

رانيا: شكرا يا فادي.. بس انت برده معندكش اصحاب كتير علي فريندشيب .. يعني مش هتعرف تساعدني.

تدخل سمر

سمر: بس انا اقدر اساعدك

رانيا: سمر؟ انتي مش مفروض في تركيا

سمر: انا صحيح في مهمة تبع شركة فريندشيب.. بس المهمة ديه هنا مش في تركيا.. و المهمة ديه هي اني اخلي مشروعك يكسب مركز اول علي المدرسة.

رانيا: طاب و انتي ليه رضيتي تساعديني؟

سمر: عشان انا محكوم عليا بالسجن .. و ديه الحاجة الوحيدة اللي هتخليهم يسامحوني.

فادي: انا بس مش فاهم انتي هتساعدينا ازاي؟

سمر: بحاجتين .. أول حاجة خبرتي في ان اخليها عندها فريندز كتيير اوي حتي لو هي متعرفهمش اصلا... تاني حاجة بالشركة ادتهولي ..الشركة مدياني باسورد ادخل بيه علي الداتا بيذ بتاعت كل برامجهم و مواقعهم .. يعني من الاخر انا اقدر اشوف كل الرسايل و الايميلات و حتي الفايلات بتاعت شادي و ديفيد و ميرنا.

رانيا: يعني كده احنا هنقدر نعرف شادي هيعمل ايه؟

سمر: بالظبط.. بما ان شادي هو اللي هيبقي مدير المشروع المنافس ليكي بعد ما افتكر اني سافرت ، فاحنا هنحتاج نعرف هو بيفكر في ايه بالظبط عشان نبقي دايما سابقينه بخطوة.

المشهد الرابع:

يدخل شادي و ميرنا و ديفيد

شادي: مش ممكن ( مستحيل بالفرنساوي) بقي رانيا المنطوية الحزينة الكئيبة المتسوحة المتفكسة بقي عندها 3000 فريند ازاي

ديفيد:  انت عارف أنا ايه اللي مستغربله بجد ازاي رانيا بقي عندها 3000 فريند حاجة غريبة بجد

شادي: شبح انت كده ! ما انا لسه قايل كده

ميرنا: سيبك منه يا شادي و ركز معايا .. ايه رأيك نحاول نهدد رانيا بالصورة اللي معانا لمذكراتها

شادي: آه صح الصورة .. هي كانت علي موبايل ديفيد .. ابعتهالي يا ديفيد

ديفيد: ما هو أصل..
ميرنا: ما هو أصل ايه ما تبعتهاله يا ابني !

ديفيد: ما أهو أنا أصلي مسحتها

شادي: نعم ! مسحتها ليه ؟

ديفيد : ايه الذاكرة كانت بتخلص و كنت هموت و أصور زهرة يوليو البنفسجية

شادي: زهرة ايه يا بابا

ديفيد: يوليو

شادي: طاب امشي من قدامي بدل ما أخليهم يولولوا عليك يا بعيد

ميرنا: يا شادي سيبك منه وخلينا نركز في المشكلة اللي عندنا

شادي: اوف .. عامل لي رومانسي اوي .. آل زهرة الربيع قال .. ناقص يقولي بحب زهرة الحب الجميل

ديفيد: ايه ده انت عرفت منين اسم صحبتي علي فريندشيب؟

شادي: بص يا ديفيد حقناً للدماء يا ريت تسكت خالص.

ميرنا: ها يا شاادي فكر معايا هنعمل ايه؟

ديفيد: بس لقيتها

شادي: آه هو يوم ملزق أنا عارف.. أنا مش قولتلك اسكت

ميرنا: خليه يقول يا شادي مش هنخسر حاجة

ديفيد: احنا نتفق مع الواد أندرو

شادي: أندرو مين؟

ديفيد: أندرو يا ابني اللي أكبر مننا بسنة .. ده أكتر واحد عنده فريندز في الدفعة اللي فوقينا.. احنا نرشيه .. نديله الخصم اللي معانا علي جزمة نايك الجديدة مقابل إنه يساعدننا بالفريندز بتوعه.. كمان ممكن نعمل اعلان إن اللي هيصوت للمشروع بتاعنا من الدفعة اللي اصغر مننا هنساعده احنا في مشروعه السنة اللي جاية.. و بكده  نبقي ضمنا إن كل الدفعتين دول في جيبنا

شادي: يا ابن اللذينة .. ايه الذكاء اللي حل عليك فجأة ده!

ديفيد: متشكر

ميرنا: عارفين احنا فعلا كنا محتاجين سمر معانا في المشروع ده

شادي: المحظوظة زمانها هايصة في ريزورت في تركيا دلوقت

ميرنا: و ايه يعني تركيا .. ما أنا كمان بصيف كل سنة في ريزورتس

شادي: ريزورت مراجيح السبتية

ديفيد: ده فين ده

شادي: ورا (س أ ل) سكول علي طول

ميرنا: ايه (س أ ل)

شادي: سيدة عيشة لانجويش سكول .. ايه مش عارفها!

ميرنا: ظريف اوي.. ما علينا خلونا نبتدي نكلم أندرو و نعمل الإعلان

شادي: يلا بينا

تدخل سمر و أمامها لاب توب

سمر: طيب اما نشوف شادي و ديفيد بيقولوا ايه في الشاتينج اللي ما بينهم .. الدفعة الكبيرة أندرو وافق يساعدهم .. الدفعة الصغيرة برضه معاهم.. ايه ده الكلام عليا.. بجد مبسوط ان سمر غارت عننا .. كانت بنت غبية و رخمة ، كنت عامل نفسي صاحبها بس عشان الفريندز اللي عندها .. بنت مش محترمة أصلاً .. ايه بجد!! ده كان رأيكواا في .. انتو شايفني كده يعني!

تدخل رانيا و فادي

فادي: سمر مالك؟

سمر: مفيش يا جماعة

رانيا: لا انتي شكلك مضايق.. في ايه؟

سمر : تعالي و شوفي بنفسك

رانيا: سمر ديه اصلا مش محترمة.. علي طول مع ولاد ، محدش بيطيقها

سمر: و انا اللي كنت متخيلة ان دول اصحابي طلعوا بيكرهوني و بيقعدوا معايا مصلحة بس .. بجد مش قادرة اصدق .. مش قادرة اصدق ان طلعت مكروهة كده .. و انا اللي كنت فاكرة ان كل الناس بتحبني .. طلعت في الاخر انا اللي ريجيكتيد .

رانيا: ماتقوليش كده .. انتي بجد مش وحشة كده زي ما هما بيقولوا لبعض .

سمر: عارفة نفسي ابقي زيك.. نفسي يبقي عندي و لو حد واحد بيخاف عليا زي ما انتي عندك اخوكي.. بس انا علاقتي باخواتي بايظة خالص و باهلي كمان .. كنت فاكرة ان صحابي هم اكتر ناس بيحبوني بس حتي دول انا بالنسبالهم مش مهمة

رانيا: انتي اللي بتقولي كده و انتي عندك اكتر من تلت الاف فريند علي فرييندشيب .. امال انا اعمل ايه

سمر: صدقيني الموضوع مش في الرقم .. الفكرة كلها في نوع الفريندز مش في عددهم .. فريند واحد بس قريب مني و بيحبني بجد اهم من مليون فريند بيتابعني علي اكونت من ورا شاشة

فادي: بس لاقيتها

رانيا: هي ايه ديه اللي لاقيتها

فادي: عرفت ازاي هنخليكي تكسبي يا رانيا

سمر: بجد ازاي؟

فادي: ركزوا معايا .. دلوقت شادي و ديفيد و ميرنا قدروا انهم يكسبوا ناس كتيير اوي من الدفعات التانية معاهم .. يعني هم اكيد معاهم فريندز اكتر مننا صح؟

سمر: صح

فادي: بس ولا حد فيهم عنده فريند واحد علي البرنامج حقيقي ..كلهم اصحاب مصلحة او ناس ميعرفهومش اصلا

رانيا: و ده ايه اهميته

فادي: احنا بقي لو غيرنا قواعد اللعبة نفسها هنكسب .. مش احنا معانا باسورد للبرنامج .. احنا مش محتاجينه عشان نتجسس عليهم ، احنا محتاجينه عشان نغير الطريقة اللي بنحدد بيها الكسبان

رانيا: مش فاهمة حاجة

فادي: يعني هنخلي اللي بيكسب في المشروع مش هو اللي عنده اكبر عدد من الفريندز لكن اللي عنده اقوي علاقة مع فريند واحد بس

رانيا: طاب و انا كده هكسب ازاي

فادي: انا و انتي بنتكلم تقريبا كل يوم و بنشير كل حاجة زي بعض و كمان دايما بنعمل لايك علي حاجات بعض .. م الاخر مفيش و لا حد فيهم عنده فريند حقيقي زي انا و انتي

سمر: اه فهمت .. كده الفكرة هتبقي في قوة علاقة واحدة بس مش في عدد العلاقات .. و بما ان انت و فادي الوحيدين اللي العلاقة بينكم حقيقية مش فيك علي البرنامج انت اللي هتكسبي

رانيا: طاب و انا هتثبت ازاي ان العلاقة بيني و بين فادي حقيقية

سمر: بكمية الشاتينج و الشير و البوستس المشتركة بينكم .. انتو دايما مع بعض و بتخافوا علي بعض بجد و ده هيظهر على البرنامج

 فادي : و بكده هيبقوا هما اللي ريجيكتيد مش انت .. هما اللي معندهمش علاقة واحدة حقيقية اللي مرفوضين مش اللي عنده علاقات اقل .

سمر: و بكده يبقي اللي بيحكم علي الناس قوة العلاقة مش عدد الفريندز.. فكرة حلوة اوي .. انا هكلم البنت بتاعت شركة فريندشيب و اقولها علي الحل ده

 

اقتراح للنهاية

المشهد السادس .. تدخل مريام و سمر و فادي و رانيا

مريام: ( يس يس شور .. اوك اي ويل دو سو).. للا سف طلبكم تم رفضه من قبل الشركة  

سمر: ازاي! هو انتي مش قولتيلي اني لي الحق اغير حاجة انا عايزاها في السيتيم بتاعكم

مريام: اه بس مش تغيروا النظام اللي الشركة كلها قايمة عليه.. راح افهمكم .. احنا عملنا اللعبة ديه كلها عشان نعرف ازاي نخلي الناس الريجيكتيد زي رانيا يبقوا تحت قواعد البرنامج بتاعنا .. عشان نعرف نتحكم فيهم زي ما بنتحكم في الباقي

فادي: و ايه هي بقي القواعد بتاعتكم

مريام: أول و أهم شي هو ان كل حاجة في العالم تبقي علي اساس عدد فريندز .. عدد فريندز بيعملوا صداقات من ورا الشاشات بقواعدنا احنا .. عشان نفضل دايما متحكمين في علاقات الناس ديه كلها

رانيا: و بعدين

مريام: و بعدين سنة سنة نجرهم انهم يشتروا اللي احنا بنبيعه و يعملوا اللي احنا عايزينه

سمر: يا سلام و مش مهم بقي الناس ديه تبقي كل علاقاتها فيك و متدمرة زيي

مريام: استاذة سمر .. لو ركزتي شوية صغار راح تعرفي ان البني ادم هو ارخص حاجة في قواعدنا

فادي: بس احنا مش هنسيبكم تتحكموا فينا كده

مريام: استاذ فادي انت صدقت نفسك و لا ايه .. انتو كلكم علي بعضكم اضعف بكتير مننا .. انتو مجرد شباب(ريجيكتيد) صغير من بلد صغيرة اسمها مصر.. انتو بمقاييسنا مرفوضين و ملكمش قيمة

رانيا: و انتو مين اصلا عشان تحكموا علينا اننا مرفوضين

مريام: (تضحك بصوت مستفز) احنا اللي بنمشي العالم ده كله .. احنا اللي بنقول للناس اللي قاعدة ديه هم محبوبين ولا لا .. احنا اللي بنختارلهم اصحابهم و افكارهم و حياتهم .. احنا اللي بنقولهم هم مقبولين و لا لا .. احنا اللي بنحرك كل الستة مليار علي فريندشيب زي العرايس ، احنا الناجحين و انتو الريجيكتيد

فادي: بس احنا مش هنسيبكم تعملوا كده خلاص

رانيا: انتو صحيح ممكن تتحكموا في العالم كله بس متقدروش تجبرونا نحب مين .. احنا اللي بنختار اننا نحب مش برامجكم السخيفة اللي هتعلمنا نعيش ازاي

مريام: و شو راح تعملوا

فادي: هنخرج من قواعدكم ديه كلها .. هنحكم على نفسنا بمقاييس تانية غير عدد الفريندز على برامجكم

سمر: صح .. و لو انتي شايفة انهم ريجيكتيد فاعتبريني من انهارده ريجيكتيد معاهم .

رانيا: و علي فكرة احنا مش لوحدنا زي ما انتي فاهمة .. احنا معانا ناس كتير اوي

سمر: بالظبط .. كل حد بقي مرفوض بقواعد برامجكم مسيره هيبقي معانا .. الناس الريجيكتيد اللي انتو بتحاولوا تدمروا  حياتهم بقالكم سنين هم اللي هيدمروكوا .

فادي: و انتو كمان مستنين ايه .. يلا اعملوا زينا

رانيا: اخرجوا من مقاييس الناس ديه .. اعملوا صحاب حقيقين مش ورا شاشات

سمر: متخافوش يقولوا عليكم (ريجيكتيد ) .. المهم تعيشوا صح

رانيا: كل حد فيكم حاسس انه وحيد

فادي: كل واحد حاسس انه مرفوض

سمر: كل واحد بمقاييس البرامج و العالم محدش بيحبه

فادي: قولوا كده  باعلي صوتكم .. احنا مقبولين

كلهم مع بعض

احنا مش ريجيكتيد

 


اجتماع اعدادي – جمعية خلاص النفوس شبرا

© www.madareselahad.org

مرفقات للتحميل