الرئيسية » مسرحيات » اسكتشات

واحد بس

313

 (المشهد الأول)

 (يدخل فانوس بيرنم ترنيمة "مين ساكن في قلبك مين" يدخل دبوس متضايق)

 فانوس: مالك يا دبوس قاعد متضايق ليه؟

 دبوس: النهاردة كان منظري وحش خالص ف المدرسة.

 فانوس: وقعت ع الأرض وانت بتلعب؟ (دبوس يهز راسه "لا").. حد ضربك؟ (دبوس يهز راسه "لا").. (فانوس يوشوش دبوس في ودنه) بنطلونك اتقطع وانت بتجري؟  (دبوس يهز راسه "لا")..اومال ايه اللي حصل ؟

 دبوس: تخيل يا فانوس ان دبوس ابو المعرفة والمفهومية اتسأل النهاردة عن حاجة مهمة ومعرفش يرد!

 فانوس: يا ترى ايه السؤال اللي مخليك متضايق كدة؟

 دبوس: النهاردة اصحابي في المدرسة سألوني هو انتوا بتعبدوا اله واحد ولا تلاتة؟ قولتلهم اله واحد.. فقالولي طيب ازاي يكون الاله الواحد ده مكون من 3 اشخاص؟ فا انا معرفتش ارد عليهم بصراحة لاني مش فاهم اوي .

 فانوس: ولايهمك يا دبوس انت معاك فانوس اللي هيحللك مشاكلك...روق كدة يابو الدبابيس.

 دبوس: ده على اساس انك فاهم يعني؟

 فانوس: عيب يا دبوس تشكك في قدراتي.

 دبوس: طب جاوب يابو العُريف ع السؤال ده.

 فانوس: (يفكر شوية ويكلم نفسه يعمل حركات اكنه بيحضّر ارواح)

 دبوس: ايه يا عم الساحر انت .. انت هتخفيني ولا ايه؟ انا بقولك جاوب ع السؤال.

 فانوس: بص ياسيدي الله واحد مش تلاتة..حلو الكلام؟

 دبوس: حلو.

 فانوس: واحنا بنعبد اله واحد.. حلو الكلام؟

 دبوس: حلو.

 فانوس: والاله ده 3 اقانيم....(يفكر مع نفسه بصوت عالي ويعد على صوابعه) .. كان معانا 1 ف الاول ودلوقتي زودنا 3.

 دبوس: يبقى كدة اربعة .

 فانوس: برافو... مانت شاطر اهوه يا دبوس اومال متضايق ليه.

 دبوس : (يزعق ف وش فانوس) شاطر ايه بس يا عم انت.. يعني لما اصحابي يسألوني بتعبدوا 1 ولا 3 اقولهم بنعبد4.

 فانوس: لأ ميصحش برضو.

 دبوس: انت مش عارف حاجة يا فانوس وبتفتي ع الفاضي.

 فانوس: بصراحة اه... بس ماتقلقش طول ما انت مع فانوس.. تيتة عارفة.

 دبوس: وياترى تيتة عارفة ولا زيك؟

 فانوس: لأ يا دبوس تيتة عارفة كل حاجة.

 دبوس: لما نشوف.

 

 (المشهد التاني)

 (يدخل دبوس وفانوس يلاقوا تيتة قاعدة بتقرا كتاب)

 فانوس: ازيك يا تيتة.

 تيتة: ازيك يا فانوس عامل ايه... ها جايلي ليه المرة ديه؟

 فانوس:  انا مش جايلك لوحدي.. انا معايا صاحبي.

 تيتة: ازيك يا حبيبي .. اسمك ايه؟

 دبوس: اسمي دبوس.

 تيتة: انا عارفة.

 دبوس: ايه ده بجد!! طب لما انتي عارفة يا تيتة بتسأليني ليه؟

 تيتة: ايه يا واد قلة الادب ديه حد يكلم تيتة كدة؟

 فانوس: معلش يا تيتة اصله متضايق شوية.

 دبوس: استنى انت يا فانوس لما نشوف حكاية تيتة ديه ايه...قولتيلي بقى يا تيتة انتي...(تيتة تقاطعه)

 تيتة: انا عارفة... عارفة كل حاجة

 دبوس: (يكلم نفسه) يا نهار مش فايت .. ديه شكلها عارفة بجد على كدة بقى هي عارفة ان انا اللي سرقت من فانوس 8 ساندويتشات البسطرمة بتوعه.... ربنا يستر. لما اسألها سؤال كدة واتأكد....... طالما انتي عارفة ..تقدري تقوليلي اسم مامتي ايه؟

 تيتة: وانا ايش عرفني؟

 دبوس: مش انتي عارفة؟

 تيتة: ايوة انا عارفة كل حاجة.

 دبوس: طب قوليلي اسم جدي الثاني عشر كان عايش فين؟

 تيتة: وانا اعرف منين؟

 دبوس: (يكلم فانوس) ايه يا فانوس ده مش انت قولتلي ان تيتة عارفة؟ اهيه يا سيدي مش عارفة اي حاجة؟

 فانوس: ايوة قولتلك اننا رايحين لتيتة عارفة ما قولتلكش اننا رايحين لساحرة تعرف منين هي اسم مامتك ايه ولا جدك الثاني عشر ده.....ااااااااه شكلك فهمتني غلط... حضرتك تيتة عارفة كل حاجة ده اسمها مش وصفها.

 دبوس: مش تقول كدة م الاول يا فانوس.. (يكلم نفسه) وانا اللي قولت انها هتفضحني... ازيك يا تيتة معلش كان في سوء تفاهم.

 تيتية: ها قولولي جاينلي عايزين مني ايه؟

 فانوس: بصي يا تيتة احنا كنا عايزين نعرف هو احنا بنعبد اله واحد ولا تلاتة ؟ عشان اصحاب دبوس سألوه السؤال ده ومعرفش يجاوب.

 تيتة: بصوا يا ولاد الله اله واحد. واحنا بنعبد الاله الواحد ده و ماينفعش نكون بنعبد اكتر من اله. هسألكوا سؤال احنا عندنا كام رئيس في مصر؟

 دبوس: واحد.

 تيتة: طب في كام رئيس في الصين؟

 فانوس: واحد.

 تيتة: عمركوا شوفتوا بلد ليها اكتر من رئيس؟ اعتقد لو حصل كدة ف يوم من الايام البلد ممكن تتدمر والشعب مش هيعرف يسمع كلام انهي رئيس. احنا كدة برضو لينا اله واحد بس.

 دبوس: طب ايه موضوع ال 3 اقانيم دول يا تيتا؟

 تيتة: ال3 اقانيم دول  هما الاّب والابن والروح القدس دو مش 3 بني أدمين ساكنين مع بعض.. لكن ليهم ادوار مختلفة.

 دبوس: مش فاهم يا تيتا.

 تيتة: بص يا دبوس.. انت بالنسبة لبابا ايه؟

 دبوس: ابنه.

 تيتة: وبالنسبة للمدرسين ف المدرسة ايه؟

 دبوس: طالب.

 تيتة: ولما تكبر وتشتغل مثلا دكتور هتكون بالنسبة للعيانين انت الي بتساعدهم يخفّوا. انت ف كل حتة ليك دور مختلف لكنك نفس الشخص وهكذا الله...الابن هو اللي نزل عشان يتصلب ويشيل عنا الخطية, والروح القدس هو اللي بيساعدنا ف الحياه وهو كمان اللي بيساعدنا اننا نصلي.هقولكوا حاجة كمان .. لو مثلا جيت قولتلكوا ان الشمس لسعتني ده معناه ان الشمس العملااااقة ديه نزلت ع الارض ولسعتني؟

 فانوس: لأ يا تيتة ده معناه ان الحرارة اللي طالعة من اشعة الشمس هي اللي لسعتك.

 تيتة: برافو عليك يا فانوس... طب كدة معنى الكلام ان الشمس حاجة واشعة الشمس حاجة تانية؟

 فانوس: لأ طبعا الاتنين حاجة واحدة.

 تيتة: الله كدة يا ولاد هو اله واحد لكن ليه 3 اقانيم كل واحد ليه دور.

 دبوس: طب انا عندي سؤال تاني يا تيتة... لما اجي اصلي.. اصلي لمين فيهم؟

 فانوس: يا ابني ما لسة تيتة قايلة انهم واحد.... الله واحد مش 3 زي ما كنا فاكرين.

 تيتة: برافو عليك يا فانوس.. عايزة اقولكوا حاجة يا ولاد..ساعات مش بنكون عارفين كل حاجة ويجي ابليس يشككنا أو ممكن حد من اصحابنا يشككنا ف ايماننا, دورنا اننا نسأل الاكبر مننا اللي يعرفوا اكتر, عشان ابليس مايضحكش علينا بسهولة. يلا بقى روحوا العبوا وانا هقعد اكمل قرايه ولو احتاجتوا اي حاجة تعالوا اسألوني.

 دبوس و فانوس: شكرا يا تيتة.
 



تأليف: ميرا هاني

©www.madareselahad.org

 

 

 

مرفقات للتحميل