الرئيسية » مسرحيات » اسكتشات

البطة يا سمسم

503

الأبطال: سمسمة – سمسم – جدو – الراوي

(سمسم نايم)

سمسمة : صباح الخير يا سمسم ... إنت لسه مصحتش ؟!!

سمسم : إيـــــــه فيه إيه عايزة إيه على الصبح كده ؟
سمسمة: إيه إللي عايزة إيه ده ؟ إنت مش هاتصحى إحنا إتأخرنا

سمسم : إتأخرنا على إيه ؟ هو مش انهاردة الجمعة ؟

سمسمة : يوووووه أيوة يا سمسم انهاردة الجمعة ... إنت نسيت اننا
               رايحين نقضي اليوم عند جدو ولا إيه ؟

سمسم: آآآآآآه صح

سمسمة: طب ياللا قوم أنا لبست خلاص قوم أنت كمان البس بسرعة
              عشان منتأخرش ... أنا رايحة أجهز الفطار

سمسم: أوك وأنا في ثواني هاكون جاهز

(ينزل سمسم وسمسمة ويطلعوا تاني )

سمسمة: يااااااه الجو جميل أوي إنهاردة

سمسم: فعلاً يا سمسمة ... ده أنا ناوي ألعب لعب إنهاردة في جنينة
             جدو
            إوعي تكوني نسيتي تجبيلي البندقية بتاعتي إنتي عارفة أنا
            باحب أصطاد العصافير

سمسمة: طبعاً جبتها ودي حاجة تفوتني برضه

سمسم: برافو يا سمسمة ... (ياخد نفسه) أخيــــرًا وصلنا

سمسم وسمسمة: صباح الخير يا جدو ... عامل إيه ؟

جدو: صباح النور يا أولاد ... وحشتوني خالص

سمسم: وحضرتك كمان يا جدو ... جدو ممكن أروح ألعب في الجنينة
             شوية
جدو: طبعاً يا حبيبي بس مش لما تفطروا في الأول ؟

سمسمة: إحنا فطرنا في البيت يا جدو ... ياللا بينا يا سمسم مش
              عايزين نضيع وقت

سمسم: طب استني لما أجيب البندقية بتاعتي

جدو: بس ألعبوا براحة ومش عايز شقاوة هاه وخد بالك يا سمسم وإنت
        بتنشن لحسن تيجيفي البط بتاعي

سمسم: متقلقش يا جدو هاخد بالي ( ينزلوا كلهم )

سمسم: شايفة يا سمسمة العصفورة إللي على الأرض إلي واقفة هناك
             دي

سمسمة: أيوه إللي جنب العشة ... مش هاتعرف تصطادها عشان بعيدة
               أوي

سمسم: طب تتحديني !!! طااااااااخ

سمسمة: يا خبر يا خبر إيه إللي إنت عملته ده ... دي جت في البطة
              والبطة باين عليها ماتت

سمسم: أيوه دي ماتت بجد طب وبعدين هنعمل إيه دلوقتي هنقول لجدو  
             إيه ؟

سمسمة: نعمل ؟؟ تعمل ... مش إنت إللي موتها أنا مالي بقى اتصرف !

سمسم: إهئ إهئ إهئ بقى كده يا سمسمة هتسبيني لوحدي

سمسمة: خلاص يا سمسم متعيطش جدو أصلا ماشفناش... إحنا ندفن
              البطة ولا من شاف ولا من دري وجدو مش هايعرف

سمسم: إنتي متأكدة إن جدو ماشفناش

سمسمة: أيوه يابني متأكدة ... ياللا بقى ندفنها بسرعة قبل ما جدو
               يجي

الراوي: وفعلاً يا أولاد دفنوا البطة ... بس إللي ماكنوش عارفينه إن جدو
          كان واقف في البلكونة وشاف كل إللي حصل

سمسم: الحمد لله الموضوع عدّى على خير ... ده لو كان جدو عرف ده
            كا...(تقاطعه سمسمة)

سمسمة: هوووووش بقى جدو جاي

جدو: هاه يا أولاد مبسوطين ؟

سمسمة: مبسوطين أوي يا جدو ... ولا إيه يا سمسم؟

سمسم: طبعاً طبعاً

جدو: طب ياللا نتغدى عشان أنا جعت خالص ... قومي يا سمسمة
        سخني الأكل ( ينزل جدو)

سمسمة: قوم يا سمسم سخن الأكل

سمسم: أنا ؟ طب وأنا مالي جدو قال قومي يا سمسمة مش يا
             سمسم!

سمسمة: يعني مش هاتقوم ؟؟ طيييييب ! أنا هاقول لجدو على البطة

سمسم: لا لا خلاص أنا هاقوم أهو

سمسمة: أيوه كده

(ينزل سمسم وسمسمة ويطلعوا مرة تانية مع جدو)

جدو: ده الواحد أكل أكل انهاردة ... معلش يا سمسمة يا حبيبتي إبقى
        اغسلي الأطباق ... ياللا أسيبكم أنا وأروح أنام شوية ( ينزل جدو)

سمسمة : إيه يا سمسم قاعد ليه ؟ إنت مسمعتش جدو ؟ ياللا قوم
               إغسل الأطباق!وإللا إنت عارف ... البطة يا سمسم

سمسم: يوووووه أووووف بقى ... حاضر حاضر ! (ينزل سمسم)

سمسمة: يا سلااااام لو مكنش سمسم موّت البطة كان زماني باغسل
              المواعين دلوقتي

سمسم: آآآآه أنا تعبت أوي يا سمسمة ... بس الحمدلله خلصت

سمسمة: خلصت ؟؟ ده لسه وراك تنضيف العشة وكمان لسه هتأكل
              البط ... أو براحتك ... بس إنت عارف إللي فيها يعني (وتنزل
              سمسمة)

سمسم: (لنفسه) وبعدين بقى ؟ هو أنا هافضل كده ؟ أنا لازم اتصرف ...
              بس أعمل إيه أعمل إيه ؟
             أروح أقول لجدو؟ لأ ده كان جدو يموتني من الضرب ... طب
             أسكت ؟ برضه لا ... سمسمة مش هاتسيبني في حالي
            وهاتفضل كل شوية تهددني وتذلني ...مش عارف أعمل إيه
            (يسكت شوية )
            أنا خلاص أنا أخدت قرار أنا هاروح أقول لجدو وإللي يحصل  
            يحصل... يا جدو يا جدو 

جدو: أيوة يا سمسم يا حبيبي

سمسم: كنت عايز أتكلم مع حضرتك في موضوع

جدو: قول يا سمسم

سمسم: طب إوعدني إنك مش هاتضربني

جدو: أضربك ليه يا حبيبي ؟ هو إنت عملت إيه؟

سمسم: أنا هاحكيلك ... أصل بصراحة يا جدو ... أنا ....

جدو: أيوة يا حبيبي أنا سامعك

سمسم: أصل بصراحة وأنا بالعب بالبندقية في الجنينة الصبح  جيت أنشن
             على العصفورة جت في البطة بس أنا مكنتش أقصد ... صدقني
            يا جدو

جدو: طب ما أنا عارف يا سمسم

سمسم: هاه ؟؟؟ عارف إزاي يا جدو ؟

جدو: ماأنا كنت واقف وقتها في البلكونة وشوفتوكم وإنتوا بتدفنوها تحت
       الشجرة ... مش ده إللي حصل ؟

سمسم: أيوه يا جدو ... أنا آسف سامحني يا جدو ... زعلان مني ؟

جدو: أنا مسامحك يا سمسم ... بس إللي زعلني إنك خبيت عليا
       ومقولتليش في وقتها علطول وسبت سمسمة تضايقك وتذللك ... لو
       كنت قولتلي من الأول مكنش كل ده حصل ... صح؟

سمسم: صح يا جدو ... أنا باوعدك مش هاعمل كده تاني

جدو: وأنا مصدقك يا سمسم

سمسم: أنا باحبك أوي اجدو

جدو: وأنا كمان يا سمسم يا حبيبي

الراوي: سمسم اتعلم درس جميل إحنا كمان يا أولاد عايزين نتعلم الدرس
          ده ... إنه لما أعمل خطية أجري بسرعة على الرب يسوع وأحكي
          معاه وأقوله سامحني وساعدني معملش كده تاني وماسبش
          الفرصة للشيطان إنه يفضل يضايقني ويقولي هاتصلي
          إزاي ,هاتتكلم مع ربنا إزاي وإنت لسه عامل كذا كذا ... متصدقش
          الشيطان ... يسوع بيحبك وهايفضل يحبك حتى وانت بتعمل
          خطية بس هو بيكره الخطية وبيكون مستنيك إنك تجي وتتوب عن
         الخطية إللي بتعملها ... إتفقنا ؟

 

© www.madareselahad.org

 

 

 

 

مرفقات للتحميل