الأبطال: جورج – توني – كلارا – جون – جيجي – جدو
جورج : ماري كريسماس يا توني
توني: ماري كريسماس يا جورج
جورج : هاه زينت شجرة الكريسماس ولا لا
توني : لا مزينتهاش ... ماليش نفس
جورج : ليه ؟ مالكش نفس ليه ؟
توني: أصلي مش فاهم يعني إيه الكريسماس ومحدش عارف يقولي بنحتفل بيه ليه
جورج : هو ده إللي مضايقك ؟؟ أنا أقولك يا سيدي ... الكريسماس ده عيد بنعلق فيه زينة كتيرة و بنحط شجرة الكريسماس وبنلبس أحمر ... ها كده فهمت ؟؟؟
توني : بس كده ؟ زينة وشجرة و لبس أحمر ... لا لا أكيد مش هو ده الكريسماس
جورج : هو ده صدقني ... بس لو إجابتي مش عاجباك روح إسأل كلارا
توني: أيوه هي كلارا إللي هتجاوبني ... يا كلارا يا كلارا إنتي فين يا كلارا
كلارا : أيوة أيوة يا توني ... إيه الدوشة إللي إنت عاملها دي ... مش مخليني أعرف أركز
توني : ليه هو إنتي بتذاكري ؟
كلارا : بذاكر ؟؟ حد يذاكر في العيد!!! أنا كنت قاعدة باغلف هدايا الكريسماس المهم كنت بتنادي عليا ليه يا سيدي ؟
توني : كنت عايز أعرف يعني إيه كريسماس ؟
كلارا: بالذمة ده سؤال يا توني ؟؟ كريسماس ده عيد جمييييييييل بندي فيه هدايا لبعض ... أمال أنا قاعدة مشغولة في إيه ... في تغليف الهدايا إللي هاديها لأصحابي طبعاً
توني: كريسماس يعني هدايا ؟؟؟ لا لا أنا مش مقتنع
جون : يا جماعة يا جماعة يا توني يا كلارا تعالوا بسرعة
كلارا وتوني : خير يا توني في إيه ؟؟؟
جون : بابا نويل جاي عندنا و جايب معاه هدايا كتييييييير
كلارا : شفت يا توني أهو هدايا ... كريسماس يعني هدايا ... صدقتني ؟؟؟
جون : أيوة يا توني كريسماس يعني هدية من بابا نويل .... ممممم يا تري بابا نويل جايبلي إيه هدية ؟؟؟
كلارا : ياللا ياللا نروح نشوف ... ياللا يا توني
توني: لا أنا مش جاي معاكو أنا مش عايز هدية أنا عايز إجابة لسؤالي
كلارا : براحتك خليك إنت كده ... إنت الخسران على فكرة ... سلام
توني ( لنفسه ) : طب وبعدين ؟؟؟ إيه الحل ؟ مين يقولي يعني إيه كريسماس ... هاحتفل بحاجة أنا مش عارفها ؟ طب إزاي ؟
جيجي : يا توني يا توني إنت قاعد لوحدك كده ليه ؟ شكلك كده مكتئب .. حد يكتئب في الكريسماس ؟
توني : أصلك مش فاهمة ... عندي سؤال ومحدش عارف يجاوبني عليه
جيجي : طب قوللي يمكن أقدر أساعدك
توني: ماشي ... يعني إيه كريسماس يا جيجي ؟؟؟
جيجي: هو ده السؤال إللي محيرك ... يا عم ده أنا قلت الموضوع أكبر من كده ... الكريسماس ده عيد بنجيب فيه لبس جديد ... إيه رأيك في الشعر ده ؟ جميييييل صح ؟
توني: لبس جديد ؟
جيجي : أيوة لبس جديد ... ده أنا حتى لسه مشترياه إنهاردة ، جبت طقم شياكة شياكة يعني
توني: أنا كمان بابا جابلي لبس جديد ... بس هو ده العيد يعني ؟ لبس جديد ؟
جيجي : لا مش لبس بس ... لبس و خروج وفسح و عزومة و تورتة شيكولاتة و أهم حاجة العيدية ... هو فيه عيد من غير عيدية ... هتديني عيدية يا توني ؟ مش إنت أكبر مني ... ههههه
توني: أنا في إيه وإنتي في إيه يا جيجي ... دايما بتقلبي الجد لهزار !!!
جيجي : خلاص يا عم متزعلش بلاش عيدية ... أنا ماشية وأتمنى أكون قدرت أجاوبك على سؤالك
توني: وبعدين بقى في الإجابات إللي مش داخلة دماغي دي ... كريسماس يعني شجرة و زينة و هدية ولبس جديد و عيدية و خروج و فسح ... هو ده الكريسماس ؟؟؟
جدو : لا يا توني يا حبيبي ... مش هو ده الكريسماس
توني : جدو ؟؟؟ حضرتك سمعتني ؟؟؟
جدو: أيوة سمعتك و سمعت إجابات أصحابك ... بس أنا يا توني عندي إجابة مختلفة تحب تسمعها
توني: طبعاً يا جدو أحب أسمعها
جدو: الكريسماس هو عيد ميلاد الرب يسوع ... الله عشان بيحبنا أرسل لينا ابنه يسوع واتولد في مزود بسيط وكل ده ليه ؟؟عشان كان له خطة عظيمة عشان ينقذنا من خطيتنا و ياخد عقابنا على الصليب عشان كده إحنا بنحتفل بالكريسماس يا توني وبنفرح وبنبسط مش باللبس الجديد ولا العيدية ولا الهدية مش ده يا توني إللي يفرحنا ... إللي يفرحنا هو إننا نفتكر إن الله حبنا حب كبييييير أوي و بعت لينا يسوع عشان يجي أرضنا .
توني: ياااااه يا جدو ... أهي هي دي الإجابات ولا بلاش... شكرا يا جدو ... أنا مبسوط إني عرفت يعني إيه كريسماس ... أنا لازم أقول لأصحابي عليه...يا جورج يا كلارا يا جيجي يا جون تعالوا بسرعة أنا عرفت يعني كريسماس
© www.madareselahad.org