مرمر وعيد القيامة
فازة ورد !!! بداية غريبة لمذكرات انهاردة مش كده ؟
هاوضح ليكي يا مذكرتي العزيزة ... دي الهدية إللي أنا
اشتريتها لماما في عيد الأم ... إنتي نسيتي إني وعدتك
المرة إللي فاتت إني أقولك أنا اشتريت لماما إيه!!
اشتريت فازة جميلة وحطيت فيها ورد اشتريته برضه
وحطيتها لماما على السفرة ، الهدية عجبت ماما أوي
وقالتلي شكرًا يا مرمر يا حلوة يا جميلة يا لذيذة يا
عسولة يا ... أنا زودتها مش كده ؟
المهم أنا بقى اليومين دول مبسوطة جدًا ... إسأليني ليه ؟ أقولك ...
عيد القيامة قرّب وده معناه إيه ؟؟؟ معناه إسبوع كااااااامل أجازة !
أيوه 7 أيام بحالهم ... على الأقل مدرستي بتعمل كده كل سنة
معرفش بقى مدرستك بتعمل كده ولا لا !! باهزر طبعًا مدرسة
إيه إللي إنتي بتروحيها!
وأهم ما في الموضوع ده إن عندي خطط جبارة للأجازة دي ...
فسح مع أصحابي وتليفزيون و Facebook محدش هيوقفني !
أنا مش ناوية أضيع دقيقة واحدة ... بس على فكرة أنا لسه
فاكرة اتفاقي مع ماما بخصوص الوقت إللي هقعده قدام
التليفزيون الكمبيوتر.
أنا بقى حصلتلي حاجة من يومين ... اتحطيت في
موقف بااااااايخ !
بصي أنا هاحكيلك من الأول ... كنا في حصة الدين والميس كانت
بتتكلم عن إسبوع الآلام وإزاي إحنا لازم نستغل الفرصة دي
عشان نقضي وقت أطول في الصلاة وقراية الكتاب المقدس ...
وكمان الميس اتكلمت عن قيامة الرب يسوع وإزاي إحنا بنحتفل
بيها لأنها بتفرق في حياتنا !! وأنا طبعًا أقولها أكيد يا ميس كلامك
كله صح ... لحد هنا الأمور كانت كويسة راحت مارينا بقى ...
ومارينا دي يا مذكرتي مش بتحب تروح مدارس الأحد رغم إني
كل شوية أقولها لازم تروحي يا مارينا ، دي مدارس الأحد مهمة ...
أنا مش بفوّت مدارس الأحد أبدًا !!! أنا عرفة إني طلعت
عن الموضوع بس كان لازم أعرّفك على مارينا !
المهم مارينا راحت سألتني سؤال ... بما إني شاطرة أوي
وباروح مدارس الأحد ... قالتلي هي يا مرمر ليه
القيامة مهمة أوي بالنسبة لينا ؟؟؟
هه !! ده كان أول رد رديته عليها !! راحت سألتني السؤال تاني ..
لقيتني بأقولها آه طبعًا القيامة مهمة لأنها قيامة الرب يسوع
بعد ما مات على الصليب وقام والتلاميذ فرحوا !! مارينا
بصتلي كده وقالتلي ما أنا عارفة الكلام ده يا مرمر ...
أنا قصدي تفرق معايا في إيه ؟؟؟
مفيش حاجة أنقذتني من الموقف ده غير جرس
الحصة إللي رن ،فقلتلها خلاص يا مارينا نتكلم في
الموضوع ده بكرة.
واكتشفت يا مذكرتي إنه كل تفكيري في القيامة كان في
الأجازة وإزاي أستمتع بيها .
وأول مارجعت البيت من قبل ما أحط الشنطة على الأرض
سألت ماما ...هي ليه القيامة مهمة بالنسبة ليّ ؟
ماما استغربت وقالتلي مالك يا مرمر ؟ قلتلها جاوبيني
الأول وهاحكيلك على إللي حصل.
راحت ماما سألتني: مرمر هو الرب يسوع اتصلب على الصليب ليه؟
قلتلها عشان يدفع ثمن خطيتي ... ماما قالتلي تمام ...
يعني تخيلي كده يا مرمر لو استمر الرب يسوع في
القبر يبقى لسه ثمن خطيتك وخطيتي متدفعش مش كده ؟
قلت لماما صح ... كان هيبقى العمل إللي الرب يسوع عمله
على الصليب علشاننا مكملش ... ماما قالتلي بالظبط يا مرمر ..
. ده غير إنه لما الرب يسوع قام أعلن لينا إنه له سلطان
حتى على الموت واحنا كمان لو متنا هنا على الأرض هيجي
اليوم إللي نقوم فيه تاني عشان نتمتع بالحياة الأبدية مع الرب يسوع.
طبعًا يا مذكرتي أنا فوجئت إنه القيامة ليها معاني كبيرة أوي
واتبسطت أوي لما عرفت كده وحكيت لماما على إللي حصل
معايا وأنا باتكلم مع مارينا .
وتاني يوم قبل ما الطابور يبدأ ناديت على مارينا وقعدت أحكي معاها ...
لقيتها اتبسطت هي كمان إنها عرفت الحاجات الجديدة دي ووعدتني
إنها هتيجي معايا مدارس الأحد المرة الجاية...
إيه ده !! أنا محستش بالوقت خالص أنا لازم أمشي دلوقتي ...
قاعدة أرغي من بدري وناسية إن ورايا واجب مخلصش ... سلااااام.
مرمر