الرئيسية » قصص » حكايات

مذكرات مرمر (اليوم الخامس )

926

خامس يوم



كنت وعدتك إني أكمل حكايتي مع ال Facebook  ، لكن

نظراً لضيق الوقت المرة إللي فاتت ... حلوة نظراً دي ...

أما إنتي يا مرمر عليكي كلام كبير ... إنما إيه ! يا ريت أستاذ

فتحي مدرس العربي يجي يشوفني وأنا باقول نظراً ... ما هو

اليوم كله عمّال يوقل لنا : نظراً لعدم مذاكرتكم فالاسبوع القادم

إمتحان في النحو من أول السنة ... ومرة تاني بنت يا مرمر ...

نظراً لأنك مجتهدة فدرجاتك في أعمال السنة هتكون عاية وهكذا .


برضه خرجت عن الموضوع قلت هاحكي عن ال Facebook  ...

إيه إللي دخل الأستاذ فتحي ونظراً ومنظرشي !!!


أه المهم لأن كان وقتي ضيق قوي اليومين إللي فاتوا ...

 

أصلي أنا كمان بابقى مشغولة زي الكبار ... متفتكريش

إني عشان أنا في سنة أولى إعدادي ... أيوة أنا بقيت في

إعدادي خلاص ... يعني ماما كانت هتوافق إني أعمل account

  على ال Facebook  لو مكنتش بقيت في إعدادي ؟!

 

أنا بقى أقولك كنت مشغولة في إيه ... الحقيقة أنتا كنت مسافرة

عشان كده مأخدتكيش معايا ... أصله بصراحة مش بيحلى

لي الكتابة فيكي غير لما باكون مضغوطة في المذاكرة ومش

عارفة أروح في حتة فأبدأ أكتب فيكي ... وحالياً الFacebook

  بينافسك !

أنا بقى حكايتي مع ال Facebook  بدأت بعد الثورة علطول

لقيت الناس في التليفزيون بيقولوا : الموضوع كله

بدأ في ال Facebook  والشباب شجعوا بعض على

ال Facebook  ولقيت الكلمة دي بتتنطط في كل حتة

وإللي زود الموضوع بقى لما صديقتي العزيزة سمسمة بتقوللي

شوفتي صور المظاهرات إللي على ال Facebook  ...

قولتلها إنتي كمان هتقولي Facebook  ... قالتلي ايوة

يا مرمر ده كل أصحابنا عاملين accounts  عليه وبندخل

نحكي مع بعض ونتفرج على صور بعض ... قلت بس

مادام فيها حكاوي أنا معاااااكو ...


وقد كان وعملت account  ولقيت يا مذكرتي العزيزة

دنيا تانية تقريباً كل أصحابنا بيحطوا صورهم ... فبنعلق

لبعض زنتكلم ونحكي الموضوع لذيذ جداً ... أول يوم

ده تقريباً قعدت اليوم كله ... وكل شويه أقول لماما شوفتي

يا ماما سارة سافرت تقوللي عرفتي منين ؟ أقوللها من

ال Facebook  وبعد شوية ... يا ماما سوزي اشترت

كلب جديد تقوللي عرفتي منين ؟ أقوللها من ال facebook  طبعاً ...

وهكذا وقعدت تقريباً أقوم وأنام وأكل قدام ال Facebook  

لحد ما في يوم ماما ناديتني وقعدت معايا ... سألتني سؤال واضح ..

. مرمر ... إيه أخبار قراية الكتاب المقدس ؟؟ قولتلها يعني

مش مواظبة قوي ... قالتلي وإيه أخبار ال  Facebook ؟

فهمت علطول قصدها ... قالتلي يا مرمر في آية حلوة

في الكتاب المقدس بتقول : "لكل شيء تحت السماوات

وقت " ... عارفة يعني إيه يا مرمر ؟


يعني قراية الكتاب المقدس ليها وقتها المهم ماينفعش

نتنازل عنه وال Facebook له وقت محدد ماينفعش

يزيد عنه . كلامنا مع أصحابنا له وقت محدد ... ماينفعش

يا مرمر أتنازل عن حاجة أساسية ومهمة في حياتي وأبدلها

مش هتفيدني غير إني أعرف أخبار أصحابي وخلاص . 


ساعتها عرفت يا مذكرتي إني ضيعت وقت كتير قدام

الFacebook  والنتيجة إني كل إللي كنت باعمله إني

باعرف أخبار أصحابي ... ومن يومها قررت إني مش

هافتح ال Facebook  غير 1/2 ساعة كل يوم ...

بس عشان أتواصل مع أصحابي إلي مش باشوفهم دايماً ...

سلام بقى دلوقتي عشان أنا لازم أقوم أحضر شنطة

المدرسة لبكرة ... باي باي 
 


مرمر