الرئيسية » قصص » حكايات

مذكرات مرمر (اليوم الرابع )

663

رابع يوم

ورجعت تاني يا مذكرتي العزيزة ... ياااااه شهور عدت من

غير ما أكتب ولا كلمة ... لأ كتبت !!! ثواني كتبت وكتبت كلام

كتير كمان !

أولاً كتبت نشيد كلنا أحباب 3 مرات... 3 مرااااات ...

ده أنا كل ما أفتكر إيدي بتوجعني !!!

وبالمناسبة دي يا مذكرتي أحب أوضح إنه نشيد كلنا أحباب

ده من كتاب العربي بتاعنا ... يمكن حد يقراكي ومايكونش

في سنة سادسة إبتدائي.

إحم إحم ... أنا خرجت عن الموضوع مش كده؟ ... سأعود!

 

    كتبتي إيه تاني يا مرمر ... كتبتي إيه تاني يا مرمر ؟

آه في ال English... حلوةEnglish  دي مش كده ؟

كتبت عدد 2 موضوع تعبير Composition  يعني ...

عجبتك يا مذكرتي العزيزة وأنا باتكلم إنجليزي ...

تاني خرجت عن الموضوع ! لا موأخذة ... آخر مرة ...

كنا بنقول إيه ؟؟ آه الإنجليزي ومدرسة الإنجليزي إللي زهقتني !

 

"مرمر ... خدي بالك من الحروف ... الحرف ده صغّريه

وده بقى كبّريه والسطر ده وسّعيه والسطر ده ضيّقيه" ...

حسستني إني بافصل هدوم مش باكتب موضوع تعبير!

ماعلينا ... أنا عارفة إنه كل ده لمصلحتي عشان أطلع

خياطة شاطرة ... باهزر باهزر!

 

     بس أنا لازم يا مذكرتي أقولك السبب إللي مخلانيش

أكتب الكام يوم إللي فاتوا... وقت الدراسة كنت مشغولة بالمذاكرة

عشان ناويت أطلع من الأوائل السنة دي ... فقررت إني

أركز في المذاكرة ... صدقيني نفسي أطلع من الأوائل بجد

فكنت ما بين المدرسة والمذاكرة ومانساش مدرسة الأحد طبعاً... دي حياتي

 

     وبدأت أجازة نص السنة وأول ماقلت يا كتابة مذكرات

بدأت المظاهرات ... ولقيت ناس كتير بتنزل ميدان التحرير!!

حلو الشعر ده مش كده

نكمل كلام بجد ... كنت أول مرة أشوف وأسمع ناس بتتظاهر

علشان عايزين حاجات ، قلت في بالي يا سلام يا مرمر ...

إنتي كمان كده في يوم إنزلي في الميدان وقولي مش

هاجاوب الميس تجاوب ... مش هذاكر الميس تذاكر !!

بس دي كلها كانت أفكار في دماغي لأنه لو ماما سمعتني

باقول كده هتقول عليا إني اتجننت

ولقيت كل قنوات التليفزيون بتجيب المظاهرات إللي

في ميدان التحرير ... جه في بالي سؤال ورحت

سألته لماما ... يعني إيه تحرير ؟؟

قالتلي تحرير يا مرمر دي بتتقال لما واحد يكون مسجون أو

محبوس ويخرج من السجن يبقى اتحرر ، أو أرض تكون

واخداها بلد تانية وأصحاب الأرض يرجعوها تبقى اتحررت.

قولتيلها زي سيناء كده قالتلي تماااام

 

     وبعد كده ماما سألتني سؤال ... قالتلي مين بقى

إللي حررنا يا مرمر ؟؟

إتخضيت طبعاً وقلتلها هو إنتي إتقبض عليكي

قبل كده وأنا ماكنتش أعرف!!

قالتلي لأ طبعاً يا شاطرة ... ده كل البشر كان

مقبوض عليهم من إبليس

قلتلها آه ... إنتي قصدك كده وفكرت شويه وقلتلها

بسبب الخطية صح؟ قالتلي تمااام

رحت قلت لماما بس لما الرب يسوع مات على الصليب فدانا

من الموت وشال عننا الخطية ... ماما إتبسطت مني أوي

لما قلتلها كده قالتلي تمااام يا مرمر ، إبليس كان مسيطر

على الإنسان بسبب الخطية لكن لما الرب يسوع مات على

الصليب دفع ثمن خطية كل واحد فينا عشان كده كل إللي

يؤمن بالرب يسوع يتحرر من الخطية إللي إبليس مقيدة بيها.

فرحت وقلت لماما يعني ميدان التحرير بتاعي هيكون عند الصليب ...

عجبت ماما أوي الجملة دي وقالتلي دايماً يا مرمر إفتكري كل

ما إبليس يجي يضحك عليكي ويقولك إنك بتعملي حاجات وحشة

وإنتي مش نافعة تكوني بنت للرب يسوع روحي عند الصليب

وقوليله يا رب سامحني وخليني أتعلم منك.

 

    عارفة يا مذكرتي ... كل مرة باتكلم فيها عن الرب يسوع

مع حد بأكون مبسوطة أوي .

أنا تعبت من كتر الكتابة دلوقتي بس عندي حكاوي كتير

عايزة أحكيهالك ... لازم أحكيلك عن حكايتي مع

ال Facebook أيوة ال Facebook  !!

 مرمر