ثانى يوم
ورجعت للمدرسة تاني !!! يااااه مش كانت الأجازة تبقى طويلة شوية؟؟؟
بس على العموم مش فارقة كتير مالخير وفير مع إنفلونزا الخنازير !!!
(حلوة القافية دي ... أنا ممكن أكتب شعر !!)
ماعلينا يا مذكرتي العزيزة ... إسأليني منين الخير ومنين إنفلونزا الخنازير؟؟
بسيطة خالص ... من أول يوم رجعت المدرسة والمدرسين مش وراهم
غير أنفلوانزا الخنازير و إغسلوا إيديكم ومحدش يستعمل إزازة حد..
..طبعا كل الحاجات دي أنا بأعملها.
لحد ما في يوم جت ميس سالي و قالت إنه زميلنا أمير جاتله إنفلونزا الخنازير!!!
سألت إزاي؟؟؟ هو كان بيلعب مع خنزير مريض ؟؟كل الفصل ضحك عليا و
الميس قالتلي يا مرمر دي إنفلونزا زي العادية لكن مشكلتها إنها قوية!!!
طب أنا يعني كنت هأعرف منين الكلام ده؟؟ مش هي برضة إسمها
إنفلوانزا الخنازير.
مش ده المهم قررت إدارة المدرسة إنه الفصل بتاعنا يتقفل !!!
وناخد أجازة 15 يوووووم .... أجاااااازة!!
وكأني يامذكرتي العزيزة باخد أجازة نصف السنة في أول السنة!!
طيب مش معايا حق لما قلت الخير وفير بسبب إنفلونزا الخنازير ؟؟!!
بس بصراحة ماما معجبهاش إللي أنا قلته وقالتلي يا مرمر بدل
ماتصلي عشان أمير يخف وربنا يحميكوا ... قاعدة تهللي إنك
أخدتي أجازة ؟ مش كان ممكن تكوني إنتي العيانة مش أمير؟؟
حسيت إن ماما معاها حق وندمت إني كنت أنانية
وفكرت في نفسي بس!!! فقعدت و صليت و قلت له يا رب
سامحني إني فكرت في نفسي.
أنا عارفة إنه ده وقت صعب علي أمير و أنا كان ممكن
أكون مكانه , من فضلك إشفيه....امين.
وأول حاجة عملتها بعد مارحت مدارس الأحد يوم الجمعة
إني صليت عشان أمير يخف و طلبت من الميس إنها تصلي له كمان.
وأحلى حاجة إنه الدرس كان عن الفتية التلاتة وإزاي
الرب يسوع كان معاهم في وسط النار والنار معملتلهمش حاجة!!
قلت له يارب أشكرك لأنك دايماً جنبي حتى في ظروفي الصعبة
لا يمكن تسيبني.
أما بقى يا مذكرتي العزيزة إيه إللي حصل لأمير هاحكيهولك
مرة تاني .... باي دلوقتي!!
مرمر